Kurapsyon ang babag

Gihangop ni Presidente Marcos ang katuyoan sa Indian-based port operator nga Adani Ports and Special Economic Zone Limited (APSEZ Ltd.) sa pag-ugmad sa pantalan sa Bataan.  Matud sa Presidente dili tanan mabuhat ug isalig lang sa gobyerno ug nga nga daghan usab ang mabuhat sa pribadong sektor. Sa kakulang sa atong pundo alang sa pagpatuman sa mga development initiatives, dako ang ikatampo sa pribadong sektor pinaagi sa Public-Private Partnership (PPP) basta dili lang sagolan og kurapsyon.  Kay ginaingon man nga “Kon ang kurapsyon maoy ipatigbabaw, ang kamatinud-anon mahimo na hinoon’g daotan”.  Fezteleern

Nagdildil og asin

Tuyo sa kagamhanan nga mo-produce ang nasud og 600,000 metriko tonelada nga asin sulod sa umaabot nga lima ka tuig aron maseguro nga matubag sa kagamhanan ang panginahanglan sa asin sa atong nasud.  Nasayod tingale ang gobyerno nga tungod sa kamahal na sa palaliton, daghan sa atong kaigsoonan nga magdildil na lang og asin isip sud-an.  Makapahinumdum sa anak nga nangutana sa iyang inahan kon unsay ilang sud-an.  Mitubag ang inahan nga anaa ra sa lamesa ang sud-an, ug nga magpili lang kini.  Apan pagtan-aw sa anak nga asin ra ang naa sa lamesa, nangutana siya nga unsa ma’y pilian.  Mitubag ang inahan pag-ingon nga, “Pagpili kon mokaon ba ka o dili”.  Pagkatoytoy!

Kulang sa focus

Buot ni Comelec Chairman George Garcia idili na ang paghulip sa usa ka kandidato nga mobakwi sa iyang kandidatora human mapupos ang gitakdang adlaw sa pag-file sa certificate of candidacy (COC).  Alang kang Garcia, usa kini ka matang sa pagpangilad sa katawhan.  Morag mabaw ra ang rason ni Garcia ug daw nagpakita nga walay focus ang ahensya sa mas mahinungdanon’g gimbuhaton sama sa pagpahigayon sa matinud-anon ug limpyo nga eleksyon.  Matud pa bitaw, “Dili mahimong modungan ka’g fucos sa duha ka butang sa samang higayon, gawas na lang kon magsud-ong ka sa totoy sa dughan sa usa ka babaye”.  Madahaan!

Andam mo-rason

Namahayag si Agriculture Secretary Francisco Tiu Laurel, Jr.  nga posibleng mosaka ang produksyon sa humay karon nga nagkahinay na ang El Nino hinungdan nga mokunhod usab ang presyo sa bugas sa umaabot.  Daw bana-bana ra man ang pamahayag sa kalihim ug wala gi-base sa siyentipiko’ng pagtuon ug dili usab pinasikad sa mga plano ug programa alang sa pagpalambo sa sektor sa agrikultura.  Mao kana’y giingon nga, “Ang maayong hiyas sa politiko mao ang pagtag-an sa umaabot ug ang kaandam paghatag og rason ngano nga wala mahitabo ang iyang panag-an”.  Muleeng!

Mokaon og wakwak

Usa sa pangindahay ni Presidente Marcos sa pagsugod pa niya sa pagpangatungdanan isip pangulo sa nasud mao nga ang nasud mahimo’g usa ka lugar diin wala na’y gutomon.  Angayan gayod nga hatagan og tinuod nga pagtagad kining maong suliran kay dili lalim ang malunosan tungod sa kagutom.  Makapahinumdum sa bata nga nagpunay’g hilak tungod sa kagutom busa, aron mohilom, gihadlok sa inahan sa pag-ingon nga, “Ayaw’g saba kay naay wakwak”. Niini gitubag lang siya sa gutom nga bata nga, “Mokaon ko’g wakwak”.  Alelert!