Di matukib nga bugti sa pagpasagad

Lima gyud ka mga kinabuhi ang nakalas dihang miulbo ang buhatan og pabuto didto sa Purok Judas Belt, Barangay Babag II, Lapu-Lapu City niadtong Lunes sa hapon, Disyembre 11.

Lakip sa mga nakalas ang tag-iya sa buhatan og pabuto nga si Chito Berdin, iyang anak nga si Gwendolyn Berdin Lucero, 31, ug anak sab niini nga si Renren, 8 anyos. Ingon man ang mga trabahante nga silang Kristian Monsanto, 34, ug Argie Escobia, 30.

Gawas sa mga namatay duna pay laing lima ka mga naangol tungod sa mga paso nga ilang naangkon.

Si Berdin membro sa Rambolet Pyro Corporation nga maoy dunay lisensiya pagpanghimo og firecrackers. Ambot og gitugot ba sa kapolisan nga maoy dunay gahom pag-regulate sa pagpamuhat og pabuto nga ang mga membro magtukod pud og ilang kaugalingong buhatan?

Istrikto ang lagda sa kapolisan niining pagpanghimo og pabuto tungod sa kapiligroso niini. Kinahanglang adto ni ibutang sa layo sa mga panimay aron malikayan ang disgrasya sama sa nahitabo niadtong Lunes.

Sigun sa imbistigasyon sa mga awtoridad, gihimo ni Berdin nga buhatan og pabuto ang iyang kaugalingong panimay nga usa ka dakong kalapasan sa lagda. Awahi na kun basolon pa ang biktima sanglit apil siya sa mga nakalas.

Apan dili pa awahi ang pagpangandam aron malikayan nga masubli ang maong trahedya sa umaabot kun himoon sa mga hingtungdang ahensiya sa kagamhanan ang ilang trabaho.

Kun wala lang magtinapolan ang mga ahensiya sa kagamhanan nga maoy dunay tahas pagbantay sa mga buhatan og pabuto nalikayan unta ang pagkausik sa lima ka mga kinabuhi. Kun gisusi lang og tarong sa wala pa mohatag og permit nabadlong unta ang paghimo sa pinuy-anan nga buhatan og pabuto sa samang higayon.

Tungod sa hitabo angayan tingali nga i-review sa gobyerno ang permiso sa Rambolet Pyro Corporation pagpamuhat og firecrackers. Kinahanglang duna silay klarong buhatan og pabuto ug dili kay adto sa panimay sa ilang mga miyembro.

Hinaot nga ang nahitabo magsilbing leksiyon sa mga regulators ug sa mga tawo nga nalambigit sa maong patigayon. Labihan ka mahal nga di matukib ang kantidad sa bugti sa pagpasagad sa kagamhanan ug sa mga hingtungdang sector.