Mahuwarong pahinumdom

Lisud usahay ning mga tawo nga nakahupot na og gahom kay bisan gani ang mga tawo nga ilang kuyog ug kasamtangan nga kabahin sa ilang panaw mahimo man nga ilang hurawon nga dunay silot nga nagpaabot kun sa usa ka reglamento dili sila maantigong mopatalinghug.

Sa laktod nga pagkasulti gimbut-an bisan gani ang mga personal nga schedule sa ilang kinabuhi. Dili ba malisod kini?

Tinuod man gyud nga matag usa kanato dunay tendency.

Ang ubang tendencies dili man maisip natong healthy. Ang ubang tendencies kun buot hunahunaon, unhealthy ug makadaut. Mao nga ning panahon nato karon, kasagaran sa punteryahon ug dauton mao man ang mga tawo nga maisip natong luoy ug walay ikasukol.

Bisan pa man kun sila masalaypon apan wala kini magpasabot nga sila sa daplin na lang isalindot.

Kahinumdom ko sa akong higala nga human maakusahi sa sexual violation ngadto sa usa ka bata ang giingnan man sa iyang superior: “You don’t have a place here, you are a scandal to the young ones!” lisod nga kahimtang nga maoy nidala kaniya ngadto sa kawalay kapaingnan ug kinaugalingon nga pakigbisog lamang aron mabuhi.

Dali ra gyud kaayo alang kanato ang pagkondenar ni bisan kinsa.

Dali ra gyud kaayo nato ang paghatag og label sa usa ka tawo. Nahikalimot kita nga sa atong panaw usab sa kinabuhi duna kitay pag-ambit usab sa atong kahuyangan ug duna sab kitay mga mantsa sa atong kinabuhi.

Ning panahon sa pandemiya daw ang gipatan-aw kanato mao ra man ang atong sayop ug kakulangan aron sa ingon ang matag tawo mamahimong mabanlas ngadto sa kawalay kapaingnan. Ang limitadong mga lihok, ang mga pagpugong tungod kay lagi maoy protocol padayon nga misipa sa atong tagsatagsa ka mga tanlag.

Padayon kitang nahasi niini ug padayong nahimong ubos mismo ang atong panlantaw sa atong kinabuhi.

Tingali sa paghimo sa ingon mamahimong mas madali ang pag depopulate sa matag tawo nga sa panan-aw sa mga nagpailang gamhanan, ang wala na gyud kinahanglana. Unsaon na lang kun kini mao na ang magdaghan.