Ang tulo ka H

Dunay higala nako nga namatay. Iyang ngalan si Hermginilda Lopez Abuan nga taga Sibonga. Tawag namo kaniya kay Sesaw.

Kun unsa ang hinungdan kun nganong gitawag namo siya nianang maong angga amo na lamang kadto. Namatay siya.

Katapusan namaong kita niadtong nagmisa ko sa usa ka paryente sa suod usab Nakong higala. Si Sesaw niingon kanako: “Pray Over ko Bi?” ug iyang gisaysay ang iyang gihambing balatian nga maoy hinungdan sa iyang kamatayon.

Ang maong kasinatian nipahinumdom kanako sa tulo ka mga H nga angayan natong pamalandongan niining Pasko sa Pagkabanhaw sa atong Ginoo.

Happiness

Bisan pa man sa gihambing balatian ug pag-antos padayon gihapon sa pagkamalipayon. Si Papa Francisco gani nagdasig man, nga mopahiyom gihapon bisan lisud ang kinabuhi!

Humility

Mao kini ang pagkamapaubsanon. Sanglit wala man kitay ato, ang tanan nga nagpalibot nato ug gani ang atong kinabuhi dili man atoa. Moabot ang panahon nga kini bakwion gikan kanato. Busa angayan kitang magpaubos taliwala sa maayong kapalaran.

Holiness

Ayaw pangandoy og bisan unsa gawas sa dakong tinguha nga mamahimong balaan aron sa tinubdan sa tanang kabalaanan kita makaatubang.

Nang Bebe aka Sesaw, padayon sa pagbahakhak sa laing kalibotan! Ug sayud ko dili ka na kapoyon sa pagsud-ong sa maayong talan-awon. Humana ang mga adlaw sa Korean Novela ug mga pasiaw kay diha sa langit dili naman pasiaw kondili tinuod nga kalipay naman ang imong masinati. In pace requiescat!