Rice farming ang palamboon

Kon walay babag nga motumaw, sa umaabot nga mga adlaw makapahimulos na sa katapusan ang mga pobreng katawhan sa nasud og labing ubos pa nga kantidad sa kilo sa bugas sa tindahan.

Kini kon madayon ang gianunsiyo sa kagamhanan nga programa diin P20 nga kilo sa bugas ang mapalit sa mga pobreng Pilipino, presyo nga gisaad ni Presidente Bongbong Marcos sa iyang pagpangampanya kaniadto.

Ang maong programa natigayon atol sa meeting ni Presidente Marcos uban ni Cebu Governor Gwen Garcia ug ubang mga gobernador sa Visayas ug opisyales sa Department of Agriculture sa Kapitolyo sa niaging semana.

Sa maong meeting nasabotan nga ang Visayas maoy himoong pilot area sa maong programa sa P20 kilo nga ibaligyang bugas nga magsugod karong pipila ka adlaw. Apan ilang nadesisyonan nga himoon kini dungan tibuok nasud.

Of course, makaingon kita nga maayo kini nga programa. Tungod kay dako kini og ikatabang sa mga kabus nga hagbay rang nagbagulbol sa ka mahal sa mga palaliton, ilabina sa mga pagkaon.

Apan ang dakong pangutana kon masustenihan ba kining maong programa gumikan lagi kay mahal na man daan ang bugas pagpalit sa kagamhanan nga mi-subsidize lamamg niini aron nga mahimong P20 ang kilo.

Dili ikalimod nga kwarta sa katawhan ra gihapon ang gituyok alang sa pagpadagan sa maong programa. Mao nang lisod kini nga molungtad, ilabina nga mahal nang daan ang pagpalit sa maong bugas.

Mas angay lamang hinuon nga unahon sa gobiyerno ang pagpalambo sa programa sa rice farming sa nasud. Kini aron nga mosaka unya ang ani sa mga mag-uuma. Ug mokubos na unya ang atong pagsalig sa pag-angkat og bugas sa ubang kanasuran.