Ang tanom tamatis ug drug lords

Halos kada adlaw, magbansiwag sa newspapers’ front page ang mga kinabuhing gipangtumba sa mga riding-in-tandem.

Walay gipiling dapit, walay gipiling oras, basta ang target makit-an bisan diha sa hayag lugar ug daghang tawo, paarakan gyud kini sa nagsiyagit mga bala sa kamatayon.

Ultimo ang guwardiyado-kinandadohang balay nga gitagoan, dili na luwas alang sa mga linalang nga naulipon na pagnegosyog gidiling drugas.

Kay ang panahon murag adunay mga mata nga magsunodsunod asa mopaingon ang mga anino nga hagbay rang gigukod sa nag-ugtas nang balaod.

Gikan sa drug addicts, users ug pushers mao ang sagad birahan-patay sa mga nagmotorsiklong killers nga nagbilin og dakong tigmo tidlom sa hunahuna sa nakasaksi.

Ang pagpamatay sa mga gagmay dili mao ang hustong hinagiban aron modaog ang war on drugs sa gobiyerno.

Kay sama sa tanom nga tamatis, ang gibuhat sa atong kapolisan mao ra ang pag-ipo sa mga udlot o nagsangang dahon nga anaa nagtuybo sa kinatumyan.

Resulta, pangpanglabay sa mga adlaw ang maong pinutlang bahin, manangag bag-o, unya mosanga pag daghang lain.

Nga sa ato pa, kon udlot lang ang kutloon sa tanom tamatis, dili gyud mamatay ang punoan. Hinunoa, molipang pa ang mga sanga, mamulak pag-ayo ug mamungag daghan.

Busa dapat, ang punoan ug mga gamot gyud maoy ibton kay niini lang paagiha nga mangahurot pagkamatay ang iyang kasangahan ug kadahonan.

Hinungdan, daghang citizens ang nagyawyaw-nahibulong nganong dili mga punoan (druglords) maoy unang gipangpukan? Nganong mga dahon ug sanga ra man?

Nagpasabot ba kini nga mas gamhanan ang  druglords kay sa kinatibuk-ang puwersa sa mga militar ug kapolisan sa Pilipinas? 

Or, may top secret nga gitipigan ang mga mananakop nga maoy nakapahimo sa mga drug lords nga very untouchable?