Kinsay angay basolon?

Nahimuot kaayo ko kaniadtong Lunes sa hapon nga nagtan-aw sa mga tawo nga dali ra motoo og binuang.

Apan ang akong gikahimut-an mao ang usa ka lalaki nga naglibre lang sa iyang kaugalingon ug nagdali nga mitungas didto sa Nivel Hills sa Lahug ug gibiyaan ang iyang asawa didto sa Hipodromo.

Pastilan, tambag nako nga ayaw dayon mo pagtoo sa mga binuang. Duna man gud kuno’y mga tawo nga nagsakay og motor nga maoy misinggit nga nagsugod na ang tsunami ug ang tubig misuyla na sa pantalan.

Kadtong mga nakadungog diha sa dalan Colon pwerteng kuyawa ug nahadagan paingon ngadto sa Fuente Osmeña ug ang uban nanakay og mga PUJ paingon sa Guadalupe, Busay ug Tisa .

May nanagdala og mga bag nga gisudlan sa sinena, ang uban nagdala sa pinangga nilang mga iro, apan kadtong taga Hipodromo kay misirit lang nga nag-drive sa motor paingon sa Nivel Hills nga siya ra usa. Nalisang kaayo siya kay nasugatan niya ang daghang tawo nga nagdinaganay ug mitaho kaniya nga ang tubig sa dagat anaa na sa North Reclamation Area.

Wala na siya makahuna-huna pag-adto sa iyang asawa ug mga anak, mideritso siya sa Nivel Hills ug gilantaw ang ubos nga bahin nga makita ang dagat.

Dihay tiguwang nga nagsunod sa iyang apo nga mitug-an nga gikan pa siya sa Mabolo ug luspad na kuno siya nga naglakaw lang paingon sa Sitio Maracas, Lahug. Gatusan usab ka tawo nga nailad didto mahidagsa sa bukid sa Guadalupe, Tisa ug ubang mga dapit. Didto na sila masayud nga biktima diay sila sa mga sayop nga kasayuran.

Sagad miingon nga pagkadungog nila nga dunay nagsingabot nga tsunami, daw giluparan sila’g langgam buntog ug misirit ra pagbiya sa ilang nahimutangan.

Ang mga kawatan wala usab hinoon mosalga. Nagtoo ko nga apil ang mga kawatan nga nangahadlok. Ikaduha, unsaon man nila ang ilang mga kinawat, asa man ibaligya nga nagtoo man sila nga anaa na ang tsunami?

* * *

Paglinog kaniadtong Lunes sa udto, didto ko sa groundfloor sa City Hall. Gikuyawan ko nga malusno ang walo ka andana nga City Hall executive building apan kun mogawas ko, matumbahan gihapon ko pananglit matumba.

Ang gihimo nako mao ang pagbarug tupad sa daku kaayo nga haligi nga semento duol sa usa sa mga entrance sa City Hall. Kini aron nga kun mahugno ang building, unya dili ko malugpitan, dali ra ko nga makagawas.

Ingon tingali niana ang angay’ng himoon nga dili gayud matarantar kun dunay ingon niadto nga katalagman.

* * *

Dugay kaayo nga nakahukom ang kadagkoan sa Department of Education (DepEd) nga dili magklase kagahapon. Resulta, nahinayak ang mga bata ug ilang mga ginikanan sa pag-adto sa mga tunghaan.

Nahukman nga dili usa magklase kagahapon aron siguroon nga ang mga school building walay kuydawo. Dalaygon kaayo ang hukom sa DepEd apan angay unta nga gihimo nila ang pagpahibalo sa gabii pa o kagahapon sayo sa buntag.

Daghang mga radio stations ang nakadawat og pangutana gikan sa mga ginikanan kun magklase ba apan walay ikatubag.

Dili mabasol si DepEd Cebu City Superintendent Rhea Mar Angtud nga mipahibalo kagahapon sayo sa buntag nga magklase kay wala man siya makadawat og order sa DepEd Regional Office.