Wa nay kapilian
Sa kataposan, sa gusto niya o sa dili, bisan sa ka-feeling hawod, kay kumbinsido nga ang kapin sa 32 milyones ka boto nga nakuha niya niadtong 2022 maoy kinakusgang panagang sa bisan unsang pagsuway pagpalagpot niya sa puwesto, mapugos na si Bise Presidente Sara Duterte pagtubag sa mga pasangil batok niya.
Bisan pa kon gitugotan sa korte ug Malacañang nga makabiyahe sa Hong Kong sa Nobyembre 6-8, kinahanglan nang mopresentar sa iyang mga ebidensiya ug mga testigo inig padayon sa impeachment trial sa alas-10 sa buntag karong Nobyembre 9
-o0o-
Dugay nang nagpaabot ang katawhan sa tubag ni VP Sara. Sa mga pasangil nga namakak sa iyang Statements of Assets, Liabilities and Net worth (SALNs) ug Income Tax Returns (ITRs), nitago sa iyang katigayonan ug gikan sa ilegal nga mga tinubdan ang daghan niyang kuwarta.
Nipasalig siyang mohatag sa tubag sa tukmang panahon ug sa tukmang forum. Ang daotang balita para niya, bisan sa tanang paglangay-langay ug paglibug-libog ug paglipat-lipat sa iyang defense team, karong Lunes na ang tukmang panahon ug ang Senate impeachment court ang tukmang forum sa iyang tubag.
-o0o-
Wala nay laing kapilian si VP Sara. Human gibasura sa impeachment court ang kataposan niyang pagsuway paglikay sa direkta nga pagtubag sa mga pasangil nga gidasonan sa mga dokumento nga gikan ra sab niya.
Nisuway unta siya pero napakyas sa pagbasura sa tanang ebidensiya nga gipresentar sa prosekusyon atol sa impeachment trial. Pormal nang gidawat sa korte ang tanan niyang SALNs, bank accounts ug transactions, ITRs, insurance, investment ug corporate records.
-o0o-
Sa ato pa, gisalikway na sa impeachment court ang bahaw ug balik-balik niyang depensa nga fishing expedition ang gihimo sa prosecutors, ilegal ang pagkuha sa iyang mga dokumento, ug unconstitutional ang proseso. Sa ato pa, human sa daghang likay-likay, pagpalaban sa Korte Suprema, pagpangangkon og politikanhong pagpanggukod ug pagkudeta sa Senado, kinahanglan na si VP Sara nga mopasabot:
• Diin gikan ang ?1.5 bilyones niyang katigayonan; nga
• Mas dako kay sa gideklarar nga net worth sa 2025 SALN nga ?98 milyones; ug nga
• Mas dako pa g’yud sa gideklarar nga income sa Bureau of Internal Revenue nga ?85 milyones.
- Latest
