Ang panalipod sa mga bata

Niining buwan sa Oktobre gisaulog sa nasud ang ika-19 ka tuig nga National Children's Month. Ang buwan sa Oktobre mahinungdanon kaayo sa mga bata tungod kay mao kini ang buwan nga gigahin sa atong gobyerno alang kanila agi og pagpahinumdom sa mga nangatungdanan sa gobyerno sa pagpanalipod sa mga bata gikan sa nagkalain-laing abuso sama sa domestic violence, human trafficking, sexual exploitation ug child labor.

Tungod sa pagkamahinungdanon sa mga bata ubay-ubay nga mga balaud ang gipalabang sa atong kongreso ingon man mga kasabutan sa nagkalain-laing kanasuran sa kalibutan ang nauyonan.

Isip panalipod sa mga bata ang Section 3, paragraph 2, Article 15 sa atong batakang balaud nagkanayon: Ang Stado manalipod sa katungod sa mga bata nga tabangan apil na sa maayong pag-atiman ug pagkaon ug pagpanalipod batok sa tanang matang sa pagbaliwala, abuso, sinalbahis, pagpahimulos ug ubang kondisyon nga makadaut sa ilang pagtubo ug paglambo. Isip pagpanalipod sa mga bata, ang kongreso mipalabang og balaud Akta Republika 9231 nga nagkanayon: Ang Stado manghilabot tungod ug alang sa mga bata kun ang ilang mga ginikanan, gisaligan o guardian, magtutudlo o mga tawo nga gitahasan sa pagbantay kanila mapakyas sa pag-atiman ug pagpanalipod kanila batok sa mga pagpangabuso, pagpahimulos ug diskriminasyon o kun ang maong matang sa pagpangabuso gihimo mismo sa ilang mga ginikanan, gisaligan o guardian, magtutudlo o mga tawo nga gitahasan sa pagbantay kanila.

Ning mao gihapong balaud, gihimong patakaran sa Stado ang pagpanalipod ug pag-rehabilitate sa mga bata nga nahulga pagmaayo o namiligro sa mga sirkumstansiya nga nakaapekto o makaapekto sa ilang pagtubo ug paglambo. Ang pinakamaayong interest sa bata maong pinakaunang hatagan og konsiderasyon sa tanang himoon mahitungod kanila whether gihimo man kini sa pangpubliko o pribadong mga social welfare institutions, courts of law, administrative authorities ug legislative bodies consistent with the principle of First Call for Children sigun sa nakalatid sa United Nations Convention on the Rights of the Child. Ang mao gihapong balaud nagkanayon nga ang tanang mga pagpaningkamot kinahanglang himoon alang sa pagpalambo sa kaayohan sa mga bata ug pagpasaka sa ilang oportunidad alang sa usa ka mabulokon ug malipayong kinabuhi.

Article 12-15 sa United Nations Convention on the Rights of the Child diin ang Pilipinas usa sa mga mipirma naglakip sa upat ka mga specific provisions on the Children's participation sama sa katungod sa mga bata sa kagawasan sa pagpadayag unsay anaa sa ilang huna-huna, konsensiya ug relihiyon; Katungod sa mga bata sa kagawasan sa asosasyon ug malinawon nga panagtigom; katungod sa libreng pagpadayag sa ilang panahom sa mga butang nga naglambigit kanila with appreciation of the views depende sa pangidaron ug maturity sa bata.

Gawas niini aduna pay Juvenile Law nga gipatuman ang atong gobyerno diin exempted sa tulubagon sa krimin ang mga bata nga nagpangidaron og kinse paubos aron lang gayod mapanalipdan ang mga bata. Apan bisan pa man niini daghan gihapong mga bata ang nabiktima sa abuso, pagpahimulos ug halos tanang matang sa mga pagpangabuso nga mao unta ang gi-target sa maong mga balaud. Gani aduna pa kitay balaud karon nga ina kay manalipod sa mga bata gikan sa abuso mao na hinoon ang gigamit sa mga abusado sa pag-abuso ngadto kanila. Tungod sa maong balaud ang mga bata gihimo nang paon sa mga abusado sa ilang paghimo og krimin. Apan bisan pa man niini, ang Stado naglaum nga padayon niining mapanalipdan ang mga bata. Hinaut pa unta nga ang atong Stado dili lamang kutob sa pagsaulog sa buwan sa Oktobre isip National Children's Month kun dili himoon usab unta niini ang tanang pagpaningkamot nga mapalayo sa pagpangabuso ang mga batang atong gilauman nga makahatag og kausaban sa nasud sa Pilipinas.