EDITORYAL - Ang pag-ani sa gipugas

Ang panultihon nga nagkanayon “kun unsay imong   gipugas mao usay imong anihon” di gyud mosipyat , kundi matuman gyud sa kinabuhi sa tawo.

Kun magbuhat ka og maayo aw natural maayo usab ang imong ugma, apan kun dimalason gyud nga bisan maayo ka og binuhatan unya maot ka og katapusan, di bali basta taas ang imong agtang nga wa kay ikauwaw mohagtos man ang katapusan nimong   gininhawa.

Ang pait mao kun nagbuhat ka og dautan ug nagyaka ka sa bahandi, ka sikat , kalipay ug kadungganan nga gipahipian og mga binilyako, minaldito ug kamangtas nga buhat,   aw ang imo usab nga katapusan   sobra pa kabug-at sa   tibuok kalibotang modat-og kanimo.

Si kanhi Pres. Marcos, namatay nga mayoridad mituo sa iyang pagka-korapso ug nabugtoan sa    kinabuhi nga diha sa kaugtas, si kanhi Pres. Saddam, giingong usa sa labing ngilngig ug banggiitang lider nga puwerting malditoha namatay nga nag-ugtas, si Bin Ladin nga nakamugna og maksaysayanon kaayong dinungan nga pagpahagsa sa twin tower   sa   London, namatay nga nag-ugtas kay diha na siya sa pagtago-tago.

Si Pres. Mubarak   buhi pa nga akusado sa korapsyon ug   pagmasaker sa mga miprotesta batok kaniya, anaa naglubog na sa banig nga makasulti pa man pero nagkanguhal na ug ang kaugtas niana siya ray nasayud.

Balik dinhi sa atong nasud, si Sec. Reyes kinsa giingon nilang naglimin sa kaharuhay gumikan sa mga gift-gift sa military namatay nga nag-ugtas tungod sa kauwaw, unya kining nag-ung-ong na usab karon sa kakutas ug sa pag-ugtas gumikan sa masaker sa Maguindanao, sa kauwaw sa panikas sa election ug pangiriw sa kuwarta sa kagamhanan, paghimo sa segunda manong helicopter nga   brand new, unsa   kaha kalawom ang ilang panighupaw, makatug kaha sila og tarong gumikan sa kaugtas? 

Hala sige pa mo kanang wa pa hisakpi ug nagplano na sa pagkawat sa mga boto sa umaabot nga election ug   sa pagkiriw   sa kuwarta sa panudlanan sa gobyerno, kombati gyud.   Di   ba?