EDITORYAL - Komusta si Singson

Karon nga giangkon na ni Kongresista Ronald Singson ang kamatuoran nga usa siya ka drug addict ug ang dala niyang cocaine sa iyang pagbiyahe ngadto sa Hong Kong niadtong miaging Hulyo, iyang kaugalingong konsumo, unsa may hunahuna sa iyang mga kaubanan sa Kongreso?

Igo lang nangutana ang publiko kun ang mga magbabalaod nga sama kang Singson angay bang magpabilin sa pagka-magbabalaod samtang sa samang higayon magsilbi siya sa iyang silot sa prisohan sa Hong Kong.

Kini samtang gipaabot nalang sa korte sa Hong Kong ang dugang testimonya ni Singson kun ang iyang gidala nga cocaine ngadto sa maong nasud, para ra sa iyang kaugalingong konsumo o aduna siya’y kaubang mogamit niini.

Pagka-anugon sa boto sa katawhan nga mipili kang Singson nga diay di man siya angayang ibutang sa taas ug halangdong katungdanan sa kagamhanan.

Kay ang iyang pagpabilin sa maong puwesto maghatag lamang og babag sa kampanya sa kagamhanan batok sa ginadiling drugas.

Kun anaa gihapon siya sa maong posisyon, inay mokalma ang mga drug addict, mosamot na hinuon tungod kay mahimo siyang inspirasyon nga diay madawat ra sa katilingban ang drug addiction ug ang pagpakatap sa ilegal nga drugas sa nasud.

Sa kuwerpo sa mga magbabalaod karon nga anaa na sa kapin kun kulang 300 dala sa House ug sa Senado, wa pa ta masayod kun wala ba kahay lain nga pareho og bisyo ni Singson. Kun anaa man ugaling, angayan bayang susihon usab sa mga liderato sa kongreso aron nga dili sila mahimong kataw-anan sa mga Pilipino ug sa mga tigpaniid sa ubang nasud sa gawas.

Kay nagtuo man ang mga tarong nga tawo nga ang mga drug addict nga kasagaran maoy nagpakusog sa krimen, sama sa tulis, lugos, kawat, pagpatay nga brutal ug uban pang dautang bisyo, mugna sa mga tawong nabuang sa ginadiling drugas. Di ba?