Walay beer

Husto g’yud ang gihimo ni Mayor Mike Rama nga dili motugot nga dunay makapamaligya og beer diha sa oval sa Fuente Osmeña rotunda.

Bisan og ang City Ordinance 1413 nagtugot nga ang mayor sa dakbayan sa Sugbo makahimo pag-isyu og special permit, apan wala niya kini himoa.

Nahadlok si Rama nga basin og mahimo kini nga sumbanan sa ubang beer companies nga kun dunay kalihukan mangayo usab og special permit kay mamaligya og beer diha sa ubang prohibited areas.

Ang mga giisip nga prohibited areas nga wala itugot ang pagpamaligya og beer ug ubang ilimnong makahubog mao ang dapit nga sulod sa 100-meter gikan sa mga ospital, tunghaan, simbahan ug public plaza.

Gidala nako kining maong isyu didto ni Rama kay nakabantay man gud ko nga pwerteng daghana nga mga lamesa ang gipahimutang sa Fuente Osmeña rotunda.

Kun dili kamo motabang isip mga sponsor sa Sinulog Foundation Inc. nga dili tugotan pagpaninda diha sa Fuente Osmeña wala kamo pugsa. Gitan-aw man gud nga pwerteng daghana kaha nga hubog sa Fuente kun itugot ang pagpamaligya og beer.

Kadtong gustong moinom og beer, lakaw na lang mo sa mga tindahan nga baligyaanan g’yud og mga ilimnong makahubog.

* * *

Daghang mga “bonafide occupants” sa yuta sa probinsya nga nahimutang dinhi sa dakbayan ang mibaligya na sa ilang mga katungod sa pag-ukopar sa maong luna.

Wala pa masayud si Capitol consultant Rory Jon Sepulveda kun kining maong mga pamilya hatagan ba sa probinsya og katungod nga makaangkon sa yuta nga ila karong gipuy-an pinaagi sa pagpadayon pagbayad pinaagi sa data-data.

Sayud ko nga daghan kaayo nga mga “bonafide occupants” nga mibaligya sa ilang rights. Mao na diha karon ang problema kun ang Kapitolyo dili motugot kanila nga makapadayon sa pagpalit sa yuta.

Apil g’yud hinoon kini nga angay’ng tan-awon sa mga opisyal sa Kapitolyo ug sa City Hall. Kay kun estriktohon, daghan ang mapalayas gihapon sa ilang gipuy-an sa mga province-owned lots.

* * *

Andam na ang LTO-Motorcycle Squad, mga sakop sa Task Force Alpha nga magsakay og motor nga mosuhid sa kadalanan aron dakpon kadtong mga sakyanan nga dili magpasiga sa ilang suga panahon sa gabii.

Apil kadtong dakpon mao ang mga drayber sa mga sakyanan nga dili kompleto og mga suga.

Kining ako, pagtabang ra g’yud kini nga dili kamo makamulta kay dagku ra ba g’yud ang multa kun Temporary Operator’s Permit (TOP) ang gamiton sa pag-isyu ninyo.

Busa mentras wala pa makasugod ang operation sa LTO-Motorcycle Squad ayoha na ang mga suga sa inyong mga sakyanan.

Unya, kamong mga drayber mas maayo nga dili na lang kamo mo-drive kun ang sakyanan walay kompletong suga.

Abi ninyo og nganong nagbalik-balik g’yud ko og awhag nga pang-ayuhon ninyo ang inyong mga suga?

Ang inyong kita sa pagpamasahero sa usa ka adlaw, maibanan og daku sa multa kun kamo madakpan. Malooy g’yud unta ko modakop sa mga drayber apan kun dili nimo himoon, dili sila ma-leksyon.

Kadaghan na ko moawhag og drayber nga ayuhon ang ilang gubaong suga nga dili magsiga panahon sa gabii, apan masugatan ug masundan lang gihapon nako nga wala ayuha.

Mao nga kun ako’y makadakop niining maong mga drayber, bisan malooy g’yud unta ko, apan mas palabihon nako nga sila makamulta.