Paraiso sa Lapu-Lapu

Maayong panig-ingnan kining “Lapu-Lapu City, Island Experience” ni Lapu-Lapu City Mayor Paz Radaza.

Tungod sa pagkunhod sa mga langyaw’ng turista nga mobisita sa Pilipinas, apil na sa Lapu-Lapu city, gilusad ni Mayor Radaza kining programa nga magdapit sa mga domestic tourists kon mga Pilipino nga mobisita sa Lapu-Lapu city.

Gipakita sa mayor ang mga daw paraiso’ng isla sa Pandanon, Gilutungan, Talima, Nalusu-an, Pamilacan ug Olango.

Gawas sa white beach, nga mas maanindot pa gani kun itandi sa ubang mga inilang baybayon sa tibook kalibutan, ang katin-aw sa kadagatan nga naglibut sa ka-islahan sa Mactan nindot alang sa scuba diving, snorkeling, kayaking ug fish feeding.

Makalingaw usab ang island hopping, bird watching ug ang pagpanihapon samtang magsud-ong sa pagsawop sa adlaw kon sunset dinner. Kining “Lapu-Lapu City, Island Experience” nagtanyag og discount package nga 50 porciento sa mga piniling hotel rooms ug ubang mga serbisyo.

 Gipakita ni Mayor Radaza nga mahimo diay’ng oportunidad ang kalamidad.

* * *

Karong Oktubre 25, magpili na kita og mga opisyal sa barangay ug sangguniang kabataan (SK).

Ang gipatoo sa Comelec nga kini usa ka non-partisan political exercise gikataw-an lang sa katawhan.

Dili ikalimod nga daghang mga dagkung politiko ang nangampanya alang sa ilang mga paboritong kandidato ginamit ang kahimanan ug salapi sa lungsod.

Gamiton usab nila ang gahum paghudlat sa mga botante aron mobotar sa ilang kandidato.

Kining pabilib sa mga politiko nga dili manghilabot niining umaabot nga barangay election dili katuhu-an kay mag-apil-apil man gayud sila matag piniliay, gawas lang sa eleksiyon og mayor sa SM.   

* * *

Daku na kaayong salapi ug panahon ang nagahin sa gobiyerno aron pagsumpo o’ kaha pagminus sa sakit nga dengue.

Ang fogging ug misting dili epektibo kay igo man lang kining mo-abug sa lamok ngadto sa laing dapit.

Maayo man unta kining pagpanglimpyo apan kining lamok nga nagdala og kagaw sa dengue anha man mangitlog sa mga limpyo’ng tubig nga magpundo.

Nganong dili man nato sundon ang gihimo sa Department of Environment and Natural Resources (DENR) Region 10 nga nananum og neem tree (azadirachta indica) aron pag-abog sa mga lamok?

Kining neem tree nga gitawag og “wonder tree” sa India usa ka insect repellant gawas nga kini tambal o’ adunay pharmacological value.

Girekomendar usab sa resident physician sa DENR 10, Dr. Nemelio Navarro ang BTi (bacillus thuringiensis israelensis) nga usa ka biological control agent batok sa mga lamok ug black fly (langaw).

Mahimo kining ibubo sa mga lim-aw ug tubigan nga sagad itlogan sa mga lamok kay aduna kini hilo nga mopatay kanila apan dili makadaut sa tawo.

Nganong wala man sagupa sa Department of Health central office kining gihimo sa DENR 10? Tungod ba kay way makikik ang DOH sa paghimo niini? 

* * *

Kining pagka-inila nga lider sa usa ka nasud dili maoy bugtong sukaranan aron paluyuhan siya sa mga botante.

Ehemplo niini mao si George W. Bush, Sr. nga bayani sa “Desert Storm” batok sa Iraq. Siya maoy labing inila ug gamhanang lider sa tibook kalibutan human gayud sa maong gubat.

Walay nagtoo nga adunay kandidato nga mobarog kontra niya niadtong 1992. Apan tungod sa nagusbat nga ekonomiya sa US gipildi lang siya ni Gov. Bill Clinton sa Arkansas.

Si Pres. Barrack Obama nga maoy unang itom nga napiling pangulo sa Amerika nga popular kaayo kaniadto, karon nagkabuang na’g sagang sa mga atake batok sa iyang mga palisiya, labi na sa ekonomiya.

Gipaabot gani nga daghang mga kandidato nga sakop sa Republican Party ang modaug batok sa mga kandidato ni Pres. Obama (Democrat) sa mid-term election karong Nobiyembre.

Nahadlok akong ingon usab niini ang mahitabo kang P.Noy kun dili niya mahunong ang kurapsiyon sa Pilipinas.

Atong tabangan si P.Noy aron siya molampus sa iyang mga tinguha, kay ang iyang kalampusan ato mang kabulahanan.

* * *

Nahimong UAAP champion sa ikatulong sunod-sunod nga tuig ang basketball team sa Ateneo de Manila University ang Ateneo Blue Eagles. Human sa elimination games nagkabangga sa championship ang Ateneo ug ang FEU.

Wala damha nga pakyawon sa Ateneo ang sunod-sunod nga duha ka duwa sa best of three.

Human sa kanunay nga pagtan-aw sa mga kulbahinam nga duwa didto sa Araneta Coliseum dili masukod ang kalipay ug garbo sa taga-Ateneo labi na sa akong grandson, Pocholo Dannon Magadia, nga freshman sa B. S. Management ug sa akong anak nga si Laurice Jade Rabacal nga magsaulog sa iyang birth anniversary karon sa Chicago. 

* * *

Bag-o lang natapus ang “Broadcasters’ Month” ug “Press Freedom Week” sa Cebu media.

Karon, kadaghanan sa kanhi empleyado sa Station DYMF (Bombo Radyo) naghunahuna nga mag-reunion.

Excited kaayo ako nga matuman kini isip usa sa nagdumala niining maong estasyonan kaniadto.

Daku nakong garbo nga nakauban ang mga inila ug tinamod karon nga mga broadcaster sa Sugbo.

Ang DYMF “alma mater” nila ni Bobby Nalzaro (KBP Golden Dove awardee), Atty. Ruphil Bañoc (next KBP chairman?) ug Ike Durano (unta dili mapugos sa iyang asawa pag-apas sa US).

Dinhi usab gikan sila si Elena Pelobello, Kit Matus Cortes, Lloyd Suarez, Gerry Auxilio, Brgy.Kapitan Yody Sanchez, Brgy. Kapitan Ramil Ayuman, Atty. Eddie Barita, Brgy. Konsehal Allan Mahait, Junrey Nadela, Juv Villar, Emy Mates Gabito, anhing Dodong Gabito, Jess Villarba, Rene Borromeo, Bong Soriano, Rommel Manlosa, Jun Megallen, Brgy.Konsehal Jeffrey Tumulak, Jun Caña, Boyet Cortes, Edwin Cañete, Ely Camomot, Quir de Gracia, Bert Palang, ug uban pa.

Nagdala usab og mga programa sa maong estasyonan kaniadto sila si kanhi CARAGA PNP Regional Director Brig. Gen. (Atty) Fritz Quiñanola, kanhi DDB Chairman Atty. Paul Oaminal, Talisay City Mayor Soc Fernandez ug ang inilang entertainment writer nga karon maglilindog sa Banat News si Kris Relatado.

Ang DYMF mao ang usa sa labing pinaminaw nga estasyonan sa radyo kaniadto tungod sa hard-hitting commentaries nila ni Bombo Bobby, Bombo Ruphil, Bombo Ike, Bombo Lloyd, Bombo Gerry ug anhing Bombo Ely Carunggay.

Gitawag kini kaniadto og “Problem Station” diin naila ang mga reporters nga “vigilantes” hangtud nga giilisdan kini og “Bombo Radyo” diin madungog ninyo ang kusog ug makabungog nga tingog sa tambol o’ bombo.

Gimingaw na ako sa pag-announce sa station break nga “Kini ang Bombo Radyo-Cebu” (hapak sa tambol) boom! boom! boom!

email: [email protected]