EDITORYAL - Bisan dili Sugbuanon basta sinsero

Ang tinahud ug tinamod nga arsobispo sa Sugbu, si Ricardo Cardinal Vidal, miangkon nga angay na unta siyang moretiro tungod sa iyang panuigon nga 78 anyos apan kini anaa ra sa pagbuot sa Ginoo.

Ug kon mahitabo na man gani nga siya mopahuway na, nanghinaut si Cardinal Vidal nga usa ka Sugbuanon maoy mabanos kaniya.

Mipakita kini sa iyang dakong pagsalig ngadto sa mga Sugbuanon. Apan dili man tingali kinahanglan nga Sugbuanon gayud ang mobanus kaniya basta duna ray sinserong pangandoy sa pag-alagad sa mga Sugbuanon.

Kay ang Cardinal bitaw dili man lumad nga Sugbuanon apan mipakita og dakong gugma ug tuyo sa pagsilbe sa mga Sugbuanon. Maoy hinungdan nga gimahal siya sa Sugbu.