Nagtipun-og na

Niay panawagan sa usa ka nagpakabanang lungsoranon nga angay nakong hatagan og agianan dinhi ning lindog sa pamasin nga makapukaw kini sa atensiyon sa nahingtungdang ahensiya sa atong kagamhanan, nasyonal man o lokal.

Ang text nagkanayon: "Gusto lang nako mahibaw-an sa atong mga opisyal sa kagamhanan sa mga siyudad nga grabe na gyod ang problema sa waste disposal. Nagtipun-og na gyod ang mga basura sa kadalanan. Maulaw na lang ta. Maayo unta nga maaksiyonan dayon ning problemaha. Grabe na gyod!" -- 0921-4189522 (Sent: 09:16:47 am--April 28, 2008)

* * *

Lapad ang langyab sa pagpakabana ning atong texter. Angay ning hatagan og pagtagad sa taga waste management. Labing maayo sab nga kitang mga lungsoranon motabang sa atong kagamhanan paghipos sa mga basura. Kitang tanan adunay responsibilidad sa paghimo sa atong lugar nga limpiyo ug luwas sa mga sakit.

* * *

"Good PM, Sir. Mangutana lang ko kun maayo ba kini sa usa ka kompaniya nga wala man sila magsubay sa hustong suweldo segun sa balaod? Ang ilang gihatag nga suweldo sa mga laborer kay P190 lang. Ang ilang gipapirmahan nga payroll kay P250 pero ang aktuwal nga suweldo P190. Luoy kaayo ang mga laborer." -- 0919-7632479 (Sent: 08:13:08 pm--April 27, 2008)

* * *

Dili gyod maayo ang gibuhat sa maong kompaniya. Kining ilang  practice dili monopoliya nila. Daghang mga kompaniya ang nahimo niini. Dili lang sa Metro Cebu kini nahitabo. May nakahunghong nako nga didto sa Tagbilaran, may mga kompaniya sab nga naghimog ingon niini.

Ang maayo ninyong buhaton mao ang pagdangop sa NLRC kay ang maong buhatan mao ray makapanalipod ninyo batok sa mapahimuslanong mga employer. Kun gusto gyod mong mangita sa kaangayan, pasakaig kaso ang inyong employer. Makagamit man mo sa serbisyo sa mga abogado sa PAO.

Kun mahadlok mong mobarog sa inyong katungod, magpadayon sa pagpanikas sa inyong kusog ang inyong employer. Nahibalo ba mo nganong misanay ang mga daotan? Tungod kay ang mga matarong walay gihimo! Busa, lihok kamo!

(Sumbong ug reklamo? Text sa 0910-8105522).