Kaminyoon

Ang kaminyoon usa ka special nga kontrata  sa bug-os nga panaghiusa sa lalaki ug babaye alang sa katukoran sa usa ka pamilya. Ang kaminyuon mao ang pondasyon sa pamilya ug usa ka institution nga gipanalipdan sa balaod ug dili gayod puwede nga lapason. Ang kaminyoon mao ang basi sa katilingban hinungdan nga kuyog niini ang interest sa katawhan. Apan naunsa na man ang atong mga hukmanan dinhi sa dakbayan ug sa lalawigan sa Sugbu nga ina kay manalipod ug mopalig-on sa kaminyoon ug pamilya ang uban kanila mipahuyang ug miabag naman hinoon sa pagpalukapa sa pondasyon sa atong nasod.

Dili palang bag-o nga gisuspenso sa iyang pagka huwes si Gaudioso Villarin sa Regional Trial Court sa Toledo gumikan sa pagkalambigit niini sa “Annulment Scam” ug pipila na ka buwan ang nakalabay lima usab ka mga huwes ang una nang gisuspenso sa Korte Suprema gumikan sa “Marriage Scam”, karon dia na poy laing huwes dinhi gihapon sa Sugbu ang imbestigahan gumikan gihapon sa Annulment Scam kana human magreklamo ang usa ka ginang nga taga Leyte tungod kay iyang nahibaw-an nga na anolar na diay ang iyang kaminyoon sa iyang bana. Matod pa, upat lamang ka bulan ang gidugayon sa anulment nga gipasaka sa iyang bana ug kini nahimoan dayon og hukom sa maghuhukom.

Sigon sa atong Family Code ang tanang annulment ug deklarasyon sa pagka nolo sa kaminyoon gikinahanglan kini nga pagatambongan sa nadistinong prosecutor sa maong hukmanan isip representante sa atong Stado aron malikayan ang panagsabot-sabot ug pagmugna og mga hinimo-himo nga mga ebidensiya sa bana ug asawa nga gusto nang muputol sa ilang kaminyuon. Apan naunsa bang pagkahitaboa nga aduna naman hinuoy ginang nga wa makahibawo nga giputol na diay ang iyang kaminyuon sa huwes. Asa man diay ang prosecutor nga nadistino ning maong sala nga wa man makapahibalo sa asawa nga gipasakaan og kasong anulment sa iyang bana? Wa lang kaha magkilo-kilo ang huwes ug ang prosecutor niining maong kaso? Awhag nako sa mag-imbestiga niining maong kaso, ayaw lang ipunting ang inyong imbestigasyon ngadto sa huwes, iapil usab ninyo sa pag-imbestigar ang prosecutor nga nadistino sa iyang sala kay labing seguro nagkomboya ni ug ang huwes aron makuha dayon sa bana ang gusto niining pagputol sa iyang kaminyuon.