Rugby boys manghingi

Padayon kong nakadawat og reklamo mahitungod nianang mga rugby boys sa merkado sa Opon. Makadaghan ko na hisgoti dinhi ang maong mga rugby boys tungod sa mga reklamo nga akong nadawat apan hangtod karon wala pa diay gihapon mabadlong kanang maong mga batan-on. Daghan na ang napuwerhisyo sa ilang gibuhat.

Usa ka magbabasa ning lindog mi-text nga nagkanayon: “Good day, Sir. Mopaambit lang ko og kasayoran diha nimo kabahin nianang mga rugby boys sa merkado sa Opon. Naghitak kana sila dinha. Unya manghingi pa gyud na sila sa mga tindera og isda, nagpula lang ang ilang mga mata kay wala katugpa. Kun dili ra ba nimo hatagan lipaton pod ka unya kuhaan ang tinda nimong isda. Maayo untag mahipos na kana sila.” -- 0910-6231424 (Sent: 01:04:23:pm--October 4, 2007)

Atong sangpiton ang atensiyon sa nahingtungdang mga awtoridad sa paghimog aksiyon kalabot niining gireklamong mga rugby boys diha sa Opon merkado. Daghan na gyud kaayo ang nagpadangat og reklamo dinhi kanako mahitungod sa maong mga badlongon. Siyaro na man sab kun wala gyud ing mga awtoridad nga makabadlong nila.

Awhagon sab nako kadtong gihasolan nianang maong mga rugby boys sa pagpadangat og pormal nga reklamo ngadto sa barangay diin nahisakop kanang merkado sa Opon. Isaysay sa inyong sinulat nga reklamo ang hinungdan kun nganong gihasolan kamo nianang maong mga rugby boys.

* * *

Ang tag-iya sa cellphone number 0906-9150208 mi-text nga nag-ingon nga aduna (kunoy) polisnga protector sa mga isnatser diha sa Colon. Bisan tuod nga gibase lang sa hunch and circumstantial evidence ang pasangil sa atong texter, angay kining susihon kay may basehanan ang iyang panahom.

“Naa man untay polis pero motan-aw ra man pod kun naay maisnatsan,” nagkanayon ang atong texter sa kataposang bahin sa iyang text.

Kun tinuod nga igo lang motan-aw ang polis kun dunay mabiktima sa pangisnats ug dili gayod siya mohimog lakang aron unta masanta ang isnatser, makapaduda gyud kun hain makapusta ang maong polis, dili ba?

 (Sumbong ug reklamo? Text sa 0910-8105522).