Police chief itinumba

Pirmi ko nga anha mag-agian diha sa Osmeña Boulevard atbang g'yod sa ganghaan-mayor sa Basilica del Santo Niño, sa laktud atubangan nianang namaligya og mga appliances.

Maayo tingali nga badlongon sa mga kawani sa Squatters Prevention Encroachment Elimination Division ang tagdumala niining maong appliance center.

Miabuso na sila pag-ayo kay pirmi sila nga nagbutang og mga kinarton nga gisudlan og mga dagko kaayo nga refrigerator ug ubang appliances anha g'yod sa agianan sa mga tawo.

Kagahapon pag-agi nako mga alas 11 hapit ang tibook aseras giukopar sa mga kinarton nga gibinlan na lang og mga duha ka dangaw ang dapit sa gutter.

Kining ato usa lang ka pagpahinumdom sa tag-iya niining maong appliance center nga naghinubra na sila. Kon magpadayon sila sa ilang binuhatan, dili malikayan nga duna g'yoy mohimo kanila og tukmang lakang.

May mga sakop man unta sa SPEED nga gidistino sa ilang hepe dihang dapita, ambot wala man usab makakita niining kasaypanan sa maong magpapatigayon.

Subra na man sab god. Hapit giukopar na man nila ang aseras nga wala nay maagian ang mga tawo. Tulo mi nga reporter sa City Hall ang nakakita sa maong talan-awon kagahapon.

* * *

Salamat nga gilimpyohan sa SPEED ang aseras ilawom nianang building nga giukopahan sa Unitop, atbang sa Basilica del Santo Niño.

Apan dili maayo ang talan-awon nga gitangtang nila kadtong mga tigbaligya og presko nga juice gikan sa prutas unya gipabilin ang courtesy booth sa Unitop nga anaa gihapon sa aseras.

Unsa man, duna diay pagpinig? Gipahibalo ko ni SPEED chief Vicente Mercado nga usa na usab ka opisyal sa City Hall ang nagdupa-dupa aron dili mahilabtan ang maong courtesy booth.

Kon ako'y anaa sa pwesto ni Mercado, apilon g'yod nako og tangtang ang maong courtesy booth. Ngil-ad tan-awon nga wala iapil ang maong binlanan sa mga butang sa mga customers.

Duna g'yoy makaduda. Bisan dili tingali tinuod pero ang uban makapangutana g'yod nga wala kaha sila mabayri?

Ang mga tindahan, kinahanglang magbutang gayod og courtesy booth nga anha sulod sa ilang balay-patigayon. Unsa kaha kon ang tanang tindahan mosunod sa gihimo sa Unitop?

* * *

Unya, naa pay grabe kaayo Mr. Mercado. Kinahanglang aksyonan dayon kini nimo kay nakasamok g'yod sa aseras. Tan-awa kanang namaligya og okay-okay nga ang display anaa na g'yod sa aseras.

Anaa kini mahimutang sa D. Jakosalem, atbang sa kanhi Solid bank. Dili na hapit maagian ang aseras kay samtang gipatunga sa aseras ang ilang mga okay-okay, ang mga tawo nga mamili naglibot niini.

* * *

Unya, atensyon mga inspector sa Liquor Licensing Commission sa City Hall.

Palihug, tan-awa ra god kanang kan-anan diha sa D. Jakosalem. Ang nahimutangan niini tungod g'yod sa Unitop kay namaligya kini og beer ngadto sa ilang mga customers.

Adtong miaging adlaw, may nakit-an gani ko nga mga kawani sa City Hall nga nanag-inom. Sayod ko nga ang City Ordinance 1413 nagdili pagbaligya og ilimnon nga makahubog sa gilay-on nga 100 ka metros gikan sa simbahan.

Ang maong dapit sulod pa sa maong gilay-on. Ngano, duna ba sila'y special permit? Akong gitan-aw og maayo, wa g'yoy special permit nga giisyu kanila sa City Hall.

Ngano man g'yod mo nga mga kawani sa City Hall nga gisweldohan gikan sa mga buhis sa katawhan, dili mo motrabaho kon dili ingnon? Kon ingnon sab, dugay kaayo molihok.