Pangilad ug responsibilidad

Unsa na man mong mga lider sa mga vendors diha sa palibot sa Basilica? Wala mo'y power sa pagkontrolar sa inyong mga sakop nga dili makasamok sa trapiko?

Ang gipasabot nako sila si Engr. Ernie Albaran ug Haidee "Basan" Amora.

Si Albaran maoy lider sa Basilica United Vendors and Photographers Association, samtang si Basan maoy presidente sa Santo Niño Sidewalk Vendors Association.

Kining ako, wala g'yod ni'y personalan. Nahinumdom mo nga dihang nagsingabot ang Asean Summit kaniadtong miaging tuig, gidayeg nako ang inyong grupo kay nakita nako nga hilabihan ka hapsay ang kilid nga bahin sa D. Jakosalem.

Apan pastilan, ang inyo diay'ng kabuotan molungtad ra man og pipila ka adlaw. Nasuta usab nako nga kon higpitan lang g'yod sa mga nagdumala sa kagamhanan, hingpit nga mapitol ang mga badlongon.

Busa, ang hagit karon anaa matumong kanila ni Vicente Mercado, hepe sa SPEED, ingon man ni Gerry Marquez, nga matud pang Mercado, abtik kaayong modupa-dupa kon duna silay operation.

Alang ni Mercado, dili ra kay diha sa palibot sa Basilica ang wala ninyo matagad, kon dili sa kinatibuk-ang dapit sa downtown area ug sa ubang bahin sa dakbayan.

Ayaw mo pagtoo nga kay kanunay ko kining gituki, kontra nako ang mga naninda diha. Gidayeg nako sila kaniadto dihang nagpakita og kabuotan, apan sawayon nako sila sa ilang pagpabadlong.

Ang rason sa ubang tindera nga angayang sabton ang ilang sitwasyon tungod sa kalisud karon sa panginabuhian, akong tubagon niining maong pangutana.

Kon ang tanang tawo mohimo og susama nga abuso sa ilang gihimo, unsa kahay dagway sa atong dakbayan? Ikapasigarbo pa ba kaha kini nga Harang Dakbayan sa Habagatan?

* * *

Dagkoa og ngisi sa mga kawani sa kagamhanan uy nga nasayod nga gimando na ni Presidente Arroyo ang paghatag kanila og 10 porsiyento nga across the board nga umento sa ilang sweldo.

Dili man hinoon tanan, apan dili ikalimod nga daghan pa kaayong mga kawani sa kagamhanan nga mga ligoy, apan kay balaod man lagi, apil sila nga paumentohan.

Aw hinoon, dili man g'yod kaayo dagko og sweldo ang anaa sa kagamhanan, apan arang-arang na lang kini kay sa ubang mga pribadong kompaniya nga misweldo lang og gagmay sa ilang kawani.

Kami hinoon sa Freeman/Philippine Star Group of Companies, kontinto g'yod kaayo sa among sweldo. Mao nga wala g'yoy mang-resign. Pero dili na lang nako idetalyi pa, apan angay unta kini nga sundon sa ubang kompaniya.

* * *

Gisuwayan ko pag-ilad niadtong Miyerkules sa hapon sa tag-iya sa cellphone number 0928-7148550.

Ingon niini ang iyang mensahe. (Last 03/20/2007 Congrats! The # of Your Cel had Won P600,000+Nokia 6630 from AbsCbn Gc. Elec.draw Dti#0378/2007 if u r interested 2 claim Call now! Atty. Rj Chua)

Kay dili man lagi ko makapugong nga binuangan ko, akong gibawsan ug gipahibalo nga dili ako ang tawo nga daling ilaron.

Gitambagan ko ni NTC regional director Danny Sy nga tawgon ang maong tawo aron posibleng madakpan ni, apan wala nay mahimo kay nag-una na ang akong text message sa walay uwaw.

Kamong uban nga makadawat niining maong matang o susama nga matang sa pangilad, ayaw g'yod pagpadala.

Kon mokubit mo, ingnon dayon mo nga modeposito og kwarta sa bangko aron makuha ang inyong daug. Daug ba uroy. Kon mailhan pa dayon, kaayo rang balhinon sa birthday sa maong tawo ngadto sa Nobyembre 1.