EDITORYAL — Mga langyaw gipasidan-an

Ang mga opisyal sa kapolisan ug imigrasyon mipasidaan ngadtos mga militanteng langyaw sa dili pag-apil-apil sa mga lihok protesta nga gitakdang himuon sa mga Pilipinhong aktibista atol sa ASEAN Summit ning umaabot nga Dis. 11-14.

Naa man guy gikatahong pundok sa mga aktibistang langyaw nga mosalmot sa mga rally nga pagahimuon sa mga militanteng Pinoy nga pasiugdahan sa Bayan.

Sumala sa kadagkuan sa kapolisan ug buro sa imigrasyon ila gayong arestohon ug pasakaag silot kadtong mga langyaw nga mosalmot sa maong mga rally.

Apan matud pa sa usa ka opisyal sa Bayan, wala sila mabalaka niining pasidaan sa mga awtoridad sa gobyerno. Ilang ipadayon, suma pa sa balita, ang paghatag og kahigayunan ngadtos mga langyaw sa pag-apil sa mga rally nga ipahigayon sa Bayan.

Naninguha ang kapolisan nga magmalinawon ang pagpahigayon sa ASEAN Summit apan ambot kon unsay mahitabo kon kusganong supakon sa mga raliyista ang lagda batok sa mga langyaw'ng mag-apil-apil sa kalihukan nga iya ra unta sa mga Pinoy.