Daghang polis daghang krimen

Puwerteng kadaghan na sa mga polis nga gipamutang sa mga eskina. Mag-uniporme pa gyud og mga battle-dress attire, ug kadaghanan kanila mga batan-on pa ug mga abtik.

Daghan niini kanila mga sakop nianang gitawag sa Philippine National Police og field training policemen (FTP) nga gipang-apod-apod sa mga police stations ug special units sa kapolisan.

Na-uso kini pag-abot ni Chief Supt. Silverio Alarcio Jr. dinhi sa Sugbo isip hepe sa Police Regional Office - 7, ug sa akong nasabtan, alang kini sila sa pagpangandam sa umaabot Disyembre, sa gipaabot natong Asean summit.

Apan naunsa man nga samtang nagkadaghan ang mga FTP - unipormado pa - nagkadaghan man usab ang krimen sa Sugbo!

Kolektaha gud ninyo ang mga pamantalaan, maghilak nang adlaw basta walay mapatik nga balita nga adunay nanulis sa bangko, lending firm, cellshop, pasahero sa PUJ, ug daghan pa.

Ngano man ni?

Dili ko gustong moingon nga palpak ang programa sa FTP dinhi sa Sugbo. Sayo ra kaayo aron husgahan ang ilang presensiya. Gikan pa gud ni sila sa bisan asang rehiyon sa Kabisay-an ug Mindanao ug mianhi lang gyud dinhi aron pag-secure sa umaabot Asean summit. Gamay ra ang kasong pagpanulis ikomparar sa mga buhat terorismo sama sa pagpamomba, pagpamatay ug pagpanggubot. Walay mga training kining mga tulisan gawas lang sa kamat-an ug kaabtik nilang dili daling madakpan sa mogukod nga kapolisan.

Busa, kun maglisud man pagsumpo sa mga pagpanulis ang kapolisan, mas labaw nang maglisud sila pagsumpo sa mga buhat terorismo unya sa Asean summit!

Kun ipanghambog sa mga polis nga kaya nilang sumpoon ang mga buhat terorismo unya sa Disyembre kun nia na ang mga pangulo sa pipila ka nasud sa Southeast Asia, unaha una ninyo pagsumpo kanang mga tulis kay gamay ra kaayo kanang problemaha ikomparar sa mga buhat sa mga terorista nga mismong mga superpower nga mga nasud sama sa Amerika, naglisud pagsumpo.

* * *

TUBIG. Kanus-a pa man mahuman kanang kontrobersiyal nga bulk water deal tali sa Ayala Stateland Consortium ug Metropolitan Cebu Water District (MCWD)?

Daghan nang sektor nga apektado sa maong isyu mitingog na ug gustong mahuman na kini alang sa mga Sugboanon. Usa niini ang Simbahang Katoliko nga wala na makaagwanta sa naabtan sa isyu.

Dili mahuman kining isyu hangtod walay usa nilang Mayor Tomas Osmeña ug sa Ayala Stateland Consortium ang moatras.

Unsaon ta man, si Tomas maisogon man nga mikampanya batok sa Ayala. Kay kang Tomas pa, kun kaaprobahan ang Carmen Bulk Water Project sa Ayala ug MCWD, alkansehon ang mga Sugboanon.

Usa sa gisupak ni Tomas ang kamahal sa kada metro kubiko nga isuplay sa Ayala ngadto sa MCWD ikomparar sa presyo sa ubang mga supplier. Apan, makasugakod ba kaha ang ubang mga supplier sa demand unya sa Sugbo, ilabi na kun modaghan pa ang mga industriya ug mga establisamentong buksan sulod sa Metro Cebu?

Laing gisupak ni Tomas mao ang probisyon sa kontrata nga kun dili maaprobahan ang proyekto sa Ayala, pabayron ang winning bidder og P200 milyones ngadto sa Ayala tungod sa mga nagasto niini pagtuon sa proyekto.

Dako ra tuod, apan sa Ayala pa, makiangayon lang nga mabayran sila sa ilang mga nagasto ug kahago pagtuon aron mapun-an ang suplay sa tubig sa MCWD. Bulahan pud ang modaug nga bidder kun mosunod sila sa mga nasugdan sa Ayala unya dili lamang sila mopahinungod.

Ang baruganan ni Tomas gipakpakan hinuon sa konseho. Gusto nilang mobarug tupad ni Tomas pagsupak sa Ayala-MCWD bulk water deal. Gawas ni Tomas, mitingkag ang dunggan ni Capitol consultant Pablo John Garcia. Kay matud niya, nag-una-una na og gasto ang Ayala-Stateland Consortium sa research ug ubang kalihukan sa proyekto bisan walay klaro nga maadto nila ang kontrata. Kang Pablo John pa, walay nagsugo sa Ayala nga mogasto og ingon kadako, busa walay rason nga bayran sila sa ilang gigasto.

Bisan pa sa kusganong pagsupak ni Tomas, iyang silingang mayor nga si Teddy Ouano aktibong nagkampanya pagpatuman sa Carmen bulk water project.

Kun si Tomas may konseho ug Pablo John, si Teddy dunay mga mayor sa amihanang lungsod nga nag-abiba kanus-a mapatuman ang proyekto. Feeling nila, ilang konstituwente ang mabulahan kun mapatuman ang proyekto.

Mao man gani nga makapangutana ko kun wala ba hunahunaa ni Pablo John ang dautang resulta sa iyang pagbarug uban ni Tomas pagsupak sa baruganan sa mga mayor sa amihanang kalungsoran. Timan-an unta ni Pablo John nga dili makabotar si Tomas kang Gwen. Unya, dihay balita nga usa si Pablo John sa gihugonhugonang palingkuron ni Tomas sa board sa MCWD. Apan kun gihimo kini ni Pablo John subay mismo sa iyang prinsipyo, mopakpak ko niya. Apan kun gihimo kini ni Pablo John aron mohumok ang kasingkasing ni Tomas diha niya aron makalingkod siya sa MCWD board, unya takulahaw lang kining mobahar sa baruganan ug dapigan ang water deal sa Ayala, usa ko sa mopanitpanit niya og tikdol.