Damgong trabaho

Alang sa kinabag-an sa kaliboan nga nagpunsisok sa dungan apan buwag nga local ug overseas job fair nga gipasiugdahan sa lalawigan sa Sugbo, dakbayan sa Sugbo, DYAB Abante Bisaya ug ABS-CBN Cebu pagtimaan sa Adlaw sa Pamuo, nga mao pay paglingkawas gikan sa mga eskuylahan ug sa labing unang higayon manimpad palaron ba sa pagtanyag sa ilang kaugalingon ngadto sa mga tag-iya sa puhonan nga takos silang saligan og mga gimbuhaton ug hatagan og suholan, ang pagpangitag trabaho dakong sugal.

Gawas tingali sa pipila nga maoy gigukod tungod sa katag-as sa ilang grado ug kangilngig sa ilang mga tulonghaan, ug sa mas gamay nga may gamhanang politikanhong mga koneksiyon, ang kasagaran natong kasarangan nga mga linalang nagkumbitay sa pamasin, nangilaba sa tsamba ug nangaliya og suwerte.

* * *

Usa sa labing dako nakong kahadlok samtang nag-eskuyla sa kolehiyo mao nga makahukom ang RAFI, ang nagasto sa akong scholarship, nga di paigo akong grado aron patrabahuon ko sa mga kompaniya sa mga Aboitiz, nga usa sa mga kundisyon sa among scholarship. Maong sa akong bakanteng mga oras, magkawat-kawat ko pagsuroy sa mga estasyon sa radyo aron tumanon ang usa sa akong damgo: Ang mag-dramaturgo.

Nisuway ko apan gibalibaran sa DYCB (karon Angel Radio) ug sa DYKC. Ang mga direktor nga naluoy pagpasuway nakog basa sa script atubangan sa mikropono sa recording studios naglingulingo nga ang-ang ang akong tingog-di na bata apan di pa sab dako. Maong wa na ko mangahas pagpangaplay sa DYHP-maibugon na lang kong naglantaw sa recording nilang Teban ug Goliat gikan sa gawas.

* * *

Tuod man, wa ko tanyagi sa mga Aboitiz og trabaho human sa akong gradwasyon. Di tungod sa akong mga grado-nga di gihapon maayo-kon dili tungod kay nakahukom silang pasagdan na lang kong magpadayon sa akong natugpahan nga posisyon: Ang pagka campus reporter sa DYLA.

Ang among suweldo niadto tag P10 kada balita nga masibya. Kon makabalita mig kalima sa usa ka adlaw, P50 ang among kita. Nga dako na kon itandi sa ubang sibyaanan niadtong dekada 80. Ang pagka magsisibya maoy nagbuhi nako sud na karon sa 22 ka tuig.

* * *

Apan nahimo kong reporter tungod lang sa tsamba. Wa tubaga sa DYRC ang akong aplikasyon nga natanggong nag pila ka buwan dihang gida ko sa akong classmate, si Warlito Villasencio (tua na ron sa Washington DC), ngadtong Sam Costanilla, ang news director sa DYLA, kinsa wa mangayog application letter nidawat dayon nako.

Alang sa bag-ong mga anak sa singot: Kon di ka madawat sa imong gidamgong trabaho, di matapos ang kalibotan. Mahimong mahilis unang sapatos og patid-patid sa lata, apan pasaligan tikang matultolan rang trabaho nga nangandoy ug nagdamgo nimo.

* * *

Email: [email protected]