Tukma si Santo Papa

Naobserbahan nako kagahapon nga bisan og ang kadagkoan sa simbahan dinhi sa Sugbo wala pa gayod makadawat sa pormal nga kamandoan gikan sa Santo Papa nga dili na maggunitay panahon sa misa, apan hinay-hinay na kining gipatuman sa atong kaparian.

Tukma g'yod kaayo ang gihimo sa atong Santo Papa. Ang paggunitay atol sa santos nga misa, gisundog lang sa mga prayer meeting. Kay kusog lagi nga mosundog kining uban, mao nga magtoo na lang usab kadtong uban nga makakita nga mao gayod kini ang tukma nga lagda.

Kaniadto ra nga kon mosimba ko, dili g'yod mogunit sa mga kamot sa mga tawo nga ikatupad nako pagsimba. Kana sab nga moyango-yango kita sa kauban nato nga nanimba, dili usab ako mohimo niana kay natan-aw nako nga usa lang kini ka pagpakaaron-ingnon.

Wala kini magpasabot nga supak ako sa pag-igsoonay. Ang tinuod, mahigalaon ug manggiloy-on kaayo ko nga pagkatawo. Dili lang g'yod ko gusto og pagpakaaron-ingnon.

Sa gibalik-balik na nako sa makadaghan nga higayon, ako bisan dili mogunit sa kamot ug dili moyango-yango panahon sa pagpahigayon sa misa, apan human sa misa gaan kanunay ang akong boot nga motagad ni bisan kinsa.

Dili sama sa uban nga kusog kaayong mogunit sa mga kamot ug moyango-yango ngadto sa mga kauban nila nga nanimba, apan inigawas nila sa simbahan, dili na sila maantigo nga mopahiyom kon imong tagdon.

Unsay buot ipasabot niini, dili ba usa lang kini ka pagpakaaron-ingnon? Usbon nako, tukma ang gihimo sa atong Santo Papa.

* * *

Pahibaw-on diay nako ang usa ka suking magbabasa niining Renbor Patrol diha sa Bohol nga nadawat na nako ang imong sulat nga nagbatbat sa mga ngalan sa mga tawo diha sa inyong dapit nga nalambigit og mga illegal nga kalihukan.

Husto ka g'yod, angay'ng maninguha ang tanan aron masumpo ang problema sa illegal nga drugas.

Isumiter nako ang imong report ngadto sa Regional Intelligence and Investigation Division (RIID) ug sa PNP Criminal Investigation and Detection Group (CIDG) regional office dinhi sa Sugbo.

Ang inyong kapolisan diha sa Bohol mahimo nila nga mandoan nga kining maong mga tawhana nga nalambigit og binuang, himoan og operation aron madakpan.

Angkonon hinoon nako nga dugay kaayo nga moaksyon ang atong kapolisan sa mga report nga atong ipadangat kanila. Unsaon nga sagad sa atong mga report maisip man nga "raw information" og magkinahanglan pa nga i-develop.

* * *

Ako diay nga daygon ang kadagkoan sa Office of the Ombudsman-Visayas nga gidumala ni Deputy Ombudsman Primo Miro, nila ni Ma'am Virgie Santiago ug Oscar Canton, mga direktor sa Ombudsman.

Sa tuig 2004, ang mga kaso nga nahimoan nila og pagtagad ug naresolbar, mas daghan kay sa gidaghanon sa ilang mga kaso nga nadawat sa miaging tuig.

Basin og mahibulong kamo ha kon ngano nga daghan pa man ang nasulbad sa mga nadawat?

May mga kaso pa man god sa tuig 2003 nga pending. Basta kay sa tanang buhatan sa Ombudsman sa lainlaing bahin sa nasud, ang Ombudsman-Visayas maoy dunay labing nindot nga accomplishment.