Telebabad sila

Karong niangkon na si Presidente Gloria Macapagal-Arroyo nga iya ang tingog sa audio recording uban sa wa niya nganli nga opisyal sa Comelec, nga gitoohang si kanhi commissioner Virgilio Garcillano, atong subayon kon tinuod ba nga igo lang siyang "nanalipod sa iyang mga boto" ug nga wa gyod siya mosuway pagmaniobra sa resulta sa eleksiyon. Kahibudngan nang daan nga si Garcillano ang iyang gitawgan pagpanalipod sa iyang mga boto sa Mindanao kay si Garcillano didto man gidestino sa Southern Luzon.

Mas makapakugang nga 15 ka higayon silang nagka-istorya gikan sa Mayo 26 hangtod sa Hunyo 10, 2004:

Mayo 26, 11:04 a.m.: Nipadayag siyag kabalaka sa hulga ni Senador Rodolfo Biazon nga mapilde siya sa Tawitawi;

Mayo 26, 11:25 a.m.: Giawhag niya si Garcillano paglangay sa iskutenyo sa Senado;

Mayo 27, 7:29 a.m.: Nangutana siya duna ba silay ERs (election returns) para sa Sulu ug naneguro nga motakdo (correspond);

* * *

Mayo 28, 10:13 a.m.: Nangutana parte sa hulga ni FPJ nga ikiha ang board of canvassers (BOC) ug militar sa Marawi;

Mayo 29, 9:43 a.m.: Naneguro nga di momenos sa usa ka milyon ang iyang mayoriya;

Mayo 29, 9:47 a.m.: Nagsusi sa iyang pagkapilde og 40,000 botos sa Cotabato;

Mayo 29, 2 p.m.: Nabalaka sa pasangil sa mga magtutudlo ug mga sakop sa BOC nga gisugo sila sa administrasyon pagpanikas;

Mayo 31, 11:17 p.m.: Gipasaligan siyang Garcillano nga pabor sa administrasyon ang Namfrel;

Hunyo 1, 9:43 p.m.: Nireklamo nga basiyo ang ballot box sa Camarines Norte nga niabot sa Kongreso;

Hunyo 2, 10:29 p.m.: Nahimangod nga wa motakdo ang statements of votes (SoVs) ug certificates of canvass (CoCs) sa Lanao del Sur ug Basilan. Nisumbong si Garcillano nga ang militar sa Basilan di kamao nga mopaburot sa mga boto sa presidente;

* * *

Hunyo 6, 7 p.m.: Nagsusi nitakdo bang mga dokumento sa Maguindanao. Nitaho si Garcillano nga si Heneral Arturo Lomibao niabot na sa Zamboanga aron paghipos sa mga testigo sa oposisyon;

Hunyo 7, 4:10 p.m.: Nabalaka siyang mosaksi pabor ni FPJ si Rashma Hali. Nipasalig si Garcillano nga iyang ipadagit ang pamilya ni Hali sa militar aron motak-om;

Hunyo 7, 7:17 p.m.: Nagsusi nakit-an na ba si Hali sa Tipotipo;

Hunyo 8, 5:51 p.m.: Unang higayon nga nitimbaya siya og "Hello, Garci" ug nipadayag og kabalaka sa press conference sa Namfrel nga nagbisto sa giingong "dagdag-bawas" sa Lanao del Sur; ug

Hunyo 10, 1:40 p.m.: Ikaduhang higayon nga niingon siyang "Hello, Garci" ug nisugo ni Garcillano sa pagseguro nga di maapektahan ang iyang mga boto sa away sa lokal nga mga kandidato sa South Upi.

* * *

Email: [email protected]