CCSC track oval kuwang sa sukod?

CEBU, Philippines — Walay rekord nga mabuak sa athletic’s track event sa Palarong Pambansa karong tuiga nga anha gihimo sa Cebu City Sports Complex gawas lang kun ang kontraktor makapakita og pagmatuod nga eksakto ang sukod sa bag-ohay lang giayo nga track oval sa maong pasilidad.

Mismo sila si Narciso Dasigan, National Technical Official and technical consultant Jeanette Obiena sa buwag nga interbyu sa The Freeman/Banat News kagahapon ang namulong niini sa pagsugod sa athletics event.

Matud pa nila magpadayun ang kompetisyon, apan bisan unsa pay rekord nga makuha sa mga atleta dili kini mahimong itandi sa kasamtangang rekord sa nangaging mga kompetisyon.

Wala mokomento si Dasigan bahin sa kondisyon ug sa pagkahimo sa oval, apan para niya, dili nila ilhon ang unsa mang rekord nga makab-ot karon kun mapatud-ang dili sakto ang 400-meter nga sukod sa track. Sa wala pa gani magsugod ang kompetisyon, duna nay nakitang “minor damage” sa rubberized oval.

 “So sa ngayon, on-hold muna kung may mag record man hangang di naming nakikita yung hinihingi nila maam Jeanette (Obiena, technical consultant in athletes) na record,” dugang pa ni Dasigan kinsa miingon nga nakahibalo na bahin niini ang mga coaches.

Sa pagkakaron, naglisod sila pagpangita sa kontraktor oval gikan pa sa pagsugod hangtud ning panahona.

“Mula pa nung first conference…Binigay naming ang mga specifications pero wala,” dugang pa ni Dasigan.

Si Obiena kinsa wala pa mohatag sa eksaktong inisyal nga sukod apan kini nagkanayon: “hindi talaga siya tukma, so we have to wait for the transit measurement.”

 “Sabi nila ibibigay nila hanggang sa nakarating na lang ako dito, up to now, wala pa ring ibinigay…Baka pagkatapos na ng Palaro,” matud pa ni Obiena kinsa miingon nga kinahanglang duha ngadto sa katulo buhaton ang pagsukod una kini ma validate nga sakto.

Hinuon, wala pay atleta nga nakabuak og karaang rekord sa track events karon gawas lang sa long jump event nga wala maapektahi sa isyu bahin sa sukod sa track.

Bisan sa 100-meter run, nagpaabot pa gihapon ang technical team sa gikinahanglang sukod.

Usa sa mga technical expert nga nihangyong dili magpahingalan nga nakahinabi sa The Freeman nga dihang gi-rubberized ang oval, unom ka buwan kining wala ipagamit aron masakto ang sukod. Gani ang Palaro record niadtong 1994 diha sa CCSC giila man kaniadto.

Dihang giayo kini niadtong 2012 sa Malaysian contractor gikatahong sakto ang sukod sa track.

Mao na kini ang ikatulong higayon nga giayo ang CCSC oval, apan ning tungora, lokal nga kontraktro ang nitrabaho.

Apil sa gituohang sub-standard mao ang lane box, kay bisan lingkuran lang sa runners mapiyapi kini. (FREEMAN)