Sari-sari store, naninda sab og shabu
CEBU, Philippines — Nasakpan sa akto ang 60-anyos nga babaye nga nitunol og ilegal nga drugas sa undercover agent sa National Bureau of Investigation atol sa buybust operation niadtong Miyerkules, Hulyo 31,2024.
Ang gidakop mao si Baby o Norma Talaba alyas Inday diha sa gamay’ng tindahan nga iya sa suspek sa daplin sa karsada sa Lapu-Lapu St., Barangay San Roque luyo sa gymnasium sa barangay.
Nakuha gikan sa dinakpan ang 24 ka paketeng gituohang shabu nga gibanabanang nagkantidad P10 mil ngadto sa P15 mil sumala sa mga opisyal sa NBI.
Ang dinakpan taud-taod nang gipanid-an sa NBI kay gigamit niya plantalya ang gamay’ng sari-sari store kilid sa dalan duol sa barangay gymnasium apan ang iyang espesyal nga baligya ilegal nga drugas ug sagad sa tigpalitan mga drayber sa mga pasaheroan.
Matud ni NBI-CEVRO Director Atty. Reynan Augustus Oliva mao kini ang hinungdan nga duna pirme mga krimen.
Matud pa sa NBI, ang dinakpan walay lipud-lipod nga miangkon sa salaod. Giingong natintal lang kini sa tanyag nga suhol sa sa usa ka babayeng tigbilin kaniya sa maong kontrabando.
Kini mitug-an nga P800 ra iyang halin sa iyang sari-sari store kada adlaw apan kun drugas moabot kini og P1,500. Nasayran nga 15 ka buok iyang mga anak ug kapin sa 20 ka apo. IBM BANAT NEWS
- Latest
