Mga estudyante sa Talisay nakadaog sa robot games

CEBU, Philippines — Upat ka tinun-an sa Talisay City Science High School ang nakadaog sa gipahigayon nga summer robot games International Open and Youth Robotics Convention 2024.

Gipasigarbo ni Mayor Gerald Anthony “Samsam” Gullas, Jr. ang upat ka tinun-an tungod kay niadtong buwan sa Nobiyembre lang gi-turnover nila ang robotics equipment sa Science High School.

Nasayran nga pila lang ka buwan gikan sa paghatag og ekipo nakadawat na og mga pasidungog ang kabataan.

Matud ni Gullas nga makalipay ang nahitabo tungod kay anaa man ang koordinasyon sa Department of Education (DepEd) ug ang kagamhanan sa Dakbayan sa Talisay.

Sa niaging buwan ang Talisay Robotics Team nisalmot sa prestihiyoso nga De La Salle Santiago Zobel School sa Alabang, Muntinluopa City nga gipasiugdahan sa Data Science and Technology Corporation.

Ang team gilangkuban nila ni Alex Rafon, Glenn Alburo, Huw Eduardo Sim ug Lowe Jay Mende.

Ang grupo nangandam na usab sa laing kompetisyon nga himuon ngadto sa nasud nga Singapore. (BDB) BANAT NEWS