Tulo ka pagpamusil, duha patay

CEBU, Philippines — Tulo ka insidente sa pagpamusil ang natala sa siyudad sa Sugbo kagahapon, Biyernes, Agosto 2, 2024 nga niresulta sa kamatayon sa duha ug usa ang naangol ug duha niini may kalambigitan sa ilegal nga drugas sumala pa sa kapolisan.

Ang unang insidente sa pagpamusil nahitabo alas 2:30 sa kaadlawon kagahapon sa Sitio Daclan, Barangay Tejero diin namatay si Ramie Jimm Gabato Villaruz alyas Longlong, 37, residente sa Sitio Back Blessed sa maong barangay. Sa impormasyon sa Police Station 3 sa Cebu City Police Office, love triangle ang motibo nga ilang gisubay kay sa wala pa ang pagpamusil nagkalalis pa ang biktima ug mamumuno tungod kay nagduda ang biktima nga karelasyon kini sa iyang kapuyo.

Human sa lalis nilakaw kini apan gisundan kini sa suspetsado ug gipusil gamit ang kalibre .45 sa nagkadaiyang parte sa lawas nga maoy hinungdan sa iyang kamatayon, daling miikyas ang mamumuno.

Pagka alas 3:48 sa kaadlawon, ang Police Station 11 miresponde og laing alarma sa pagpamusil sa Sitio Naba, Alaska, Barangay Mambaling diin usa ka Victor Agillon, 37, ang nakalas human gipusil og duha ka wala mailhing mga tawo. Kalambigitan matud pa sa ilegal nga drugas ang motibo.

Nasayran ang biktima bag-o lang nakagawas sa prisuhan human kini nabilanggo gumikan sa kalambigitan sa ilegal nga drugas.

Gitubag kini og laing pagpamusil kagahapon sa buntag diha sa Sitio All Season, Barangay Cogon Pardo diin usa ka Mark Anthony Socorro, 22, nga naalaang asset ang gipusil sa manag-agaw nga sila si alyas John ug alyas Liam.

Sa impormasyon sa Police Station 7, kalambigitan sa illegal nga drugas ang motibo sa suway pagpatay sa biktima. Swerte lang nga nakabantay kini ug nakiglayog sa usa sa mga suspek hinungdan nga nakahigayon sa pagdagan maong wala kini maigo sa pagpusil kaniya sa duha.

Si Police Lieutenant Colonel Janette Rafter, Deputy City Director for Administration miingon nga ang mga biktima ug suspek managkaila ra maong di angay ikaalarma sa publiko.

Sa pikas bahin, usa ka 39-anyos nga lalakeng nagmaoy sa kahubog ug nagbitbit og armas gidakop sa mga sakop sa Labangon Police Station diha sa Sitio Capaculan, Barangay Tisa, Huwebes sa gabii.

Ang dinakpan mao si Noeh Gerasol Balataria nga nakuhaan og kalibre .38 rebolber nga adunay duha ka bala. Gikatahong miangkon kini nga ang armas gi-pa swapan lang og shabu.

Samtang sa Barangay Poblacion sa Lungsod sa Carmen nadakpan kagahapon sa kaadlawon ang usa ka Jhondel Bombita, kinsa naagian sa nagpatrolyang mga polis apan kadudahan og lihok maong ilang gisita ug nasakpang  nagluklok diay og .357 magnum revolver nga kargado og lima ka bala apan wala siyay napakitang dokumento sa paghupot niini. Rowena D. Capistrano/IBM BANAT NEWS