Saleslady nga way sapot napalgang patay

CEBU, Philippines — Patay nang napalgan sulod sa ilang kwarto ang usa ka 27 anyos nga babayeng saleslady nga hubo ang lawas ug nasunog ang buhok niini pasado alas-12 sa gahapon sa udto diha sa ilang pinuy-anan sa Sitio Laguna, Barangay Bulacao, Siyudad sa Sugbo.

Ang babaye mao si Charina Baoy Relativo, 27, nagpuyo sa naasoy nga lugar.

Nagkanayon si Police Captain Yves Montejo, Deputy Chief of Police sa Police Station 7 sa Cebu City Police Office nga ang kaipon sa babaye kinsa naa sa trabahoan atol sa pagkahitabo nahibulong kini nganong di motubag sa tawag sa cellphone ang iyahang pares.  Hinungdan nga gitawagan niini iyahang amigo ug gipasusi ang ilahang kwarto.  Ug didto kini nakit-an nga naghigda sa sawog nga hubo ang lawas, gituohang gikan pa kini kini naligo.

Gituohang aksidente kining natumba ug naigo matod pa ang ulo niini sa butane stove nga adtong tungora gasiga kay  aduna kini giluto maong nasunog ang buhok niini.

"Naigo man iyahang ulo didto and partially burned man iyahang buhok," matud ni Montejo.

Sa inisyal nga paghiling sa kapulisan sa patay'ng lawas wala'y nakitang indikasyon nga dunay mga samad ang biktima.

Apan aron makasiguro girekomendar nila nga ipa- autopsy ang patay'ng lawas niini aron masuta kun unsay gikamatyan ug kun unsay nahitabo sa wala pa kini mapalging patay. IBM BANAT NEWS