Tukma nga paglabay sa basura itudlo sa mga tunghaan
CEBU, Philippines — Nagkahiusa karon ang buhatan sa Mandaue City Environment and Natural Resources Office (MCENRO) ug ang Department of Education (DepEd) Mandaue City Division nga makat-on ang kabataan sa dakbayan sa Solid Waste Management pinaagi sa pagtudlo niini diha sa mga tunghaan.
Hingpit unya nga kasugdan ang ilang panag-alayon sa DepEd ug Mandaue City Environment and Natural Resources nonot sa pagahimoon nga paglusad sa Solid Waste Management Concept.
Ang Solid Waste Management Concept gilusad sa Mandaue City pinaagi sa pagsagop usab sa Department of Education aron ibutang sa curriculum alang sa pagtudlo sa mga bata.
Gitinguha sa siyudad sa Mandaue nga hatagan og kahibawo ang mga estudyante labot sa insaktong paglabay sa basura ug pagpreserbar sa kalikopan.
Si Mandaue City Environment and Natural Resources Head Arh. Araceli Barlam ug ang kadagkoan sa DepEd pinangulohan sa Schools Division Superintendent nga si Dr. Bianito Dagatan magkahiusa sa paglusad sa SWM Concept.
Ang konsepto sugdan sa pag-implementar sa mga tunghaan sa siyudad atol sa pagbukas sa klase sa school year 2024-2025.
Si Mandaue City Mayor Jonas Cortes naglantaw sa paglakip sa kabataan nga katudloan sa pagpakabana sa pagpreserbar sa kalikopan. (BANAT NEWS)
- Latest
