26 anyos nga nagpatuli sa Lapu-Lapu nakadawat og P10,000

CEBU, Philippines — Nakadawat og P10, 000 nga salapi gikan kang Lapu-Lapu City mayor Junard “Ahong” Chan ang usa ka 26 anyos nga nasuta nga maoy labig taas na og edad nga nipahimulos sa libreng tuli nga gipahigayon sa Hoops Doom sa Barangay Gun-ob sa Siyudad sa Lapu-Lapu.

Ang 26 anyos nga lalake residente sa barangay Basak, siyudad sa Lapu-Lapu ug segun sa post ni Lapu-Lapu City mayor Junard Ahong chan, swerte kini kay ang nag assist kaniya mao ang Binibining Lapu-Lapu 2023 nga si Cheron Kisses Co.

“Swerte pa gyud kaayo kay ang nag-assist niya kay ang atong maanyag kaayu nga. Gi-assist sad siya sa atong batan-on nga Brgy Captain sa Looc nga si Kap Jaic Tampus. Ang mi-opera niya kay si Dr Ashley,” Chan. Pagbasa FB post ni Chan.

Giapilan sa kapin 2,000 ka mga bata ang maong kalihukan nga gipasiugdahan sa kagamhanan sa siyudad.

Gikalipay sa mga ginikanan ang maong programa nga nakatabang kanila nga wala gyud makagasto bisan piso ug aduna usab gihatag nga libreng pagkaon.

Nanghinaut si mayor Chan nga daghan pa sa kabataan ang mopahimulos sa libreng serbisyo ug ang kataposan nga petsa sa paghatag og libreng tuli karong Hunyo 28, 2024 nga gipaabot nga maka-accommodate og laing 1,000 ka mga bata. (BANAT NEWS)