Garcia: Disiplina ug responsableng paghipos sa basura maoy kinahanglan

CEBU, Philippines — Gipangunahan ni acting Cebu City Mayor Raymond Alvin Garcia ang pag-abli sa 16th  Cebu Citywide Cleanup Challenge kagahapon sa buntag, Sabado, Hunyo 22, 2024, sa IL Corso FilinVest Malls, South Road Properties, Dakbayan sa Sugbo.

Sa iyang mensahe, gihatagan og dakong pagtagad ni Garcia ang kahinungdanon sa pagka-responsabli ug pagdisiplina sa paglabay sa basura.

"What we want to accomplish is not only your responsibility or my responsibility. It is the responsibility of each everyone, that's why we always say, it is a shared responsibility of each of us," pulong pa ni Garcia

Suma pa ni Garcia, kinahanglanon nga mapangusgan kini hilabi na karong 'wet season' diin pipila na ang naobserbahan nga pagbaha sa pipila ka mga lugar sa dakbayan.

Subay niini, mapasalamaton gihapon ang mayor sa mga River Troopers sa ilang pag-atiman sa palibot diin kada adlaw kini nanglimpyo sa kasapaan, lakip na niini ang mga coastline rivers management unit.

Samtang si Konsehal Donaldo “Dondon” Hontiveros miawhag sa tanan nga ipadayon ang pagdisiplina sa kaugalingon ug kini angay sugdan diha sa panimalay, sa komunidad ngadto sa ilang barangay.

"Continue to be stay amazing, be a blessing and continue to be the change that you want to see," dugang pa ni Hontiveros .

Ang Chairman sa Committee on Environment na si Cebu City Councilor Joel Garganera mipaambit sab sa kun say kinahanglang pagabuhaton kini aron makab-ot ang tumong ug tinguha na malimpyohan ang palibot.

Bahin niana, gipasidunggan sab ang tulo ka barangay nga mao ang Basak San Nicolas, Brgy. Carreta ug ang Brgy. Tejero nga hugot nga miimplementar sa waste segregation ug waste recycling diha sa ilang mga konstituwente.

Atol sa gipahigayon nga kalihokan, misalmot sab ang DILG Cebu City Director Dr. Neila Aquino, ahensiya sa gobyerno ug lakip na niini ang mga kawani sa gobyerno.

Niadtong Hunyo 19, 2024, nakigtigum ang sa Cebu City Environment and Natural Resources Office (CCENRO) sa mga river troopers sa Task Force Gubat sa Baha sa dakbayan isip kabahin sa pagpangandam alang sa 16th Cebu Citywide Cleanup.

Ang CCENRO ang gitahasan nga maoy manguna sa pagpahigayon sa cleanup sulod na sa duha ka mga higayon karong tuiga.

Nitambong sab sa meeting miadtong miagi adlaw ang mga deputy river commander sa walo ka mga dagkong sapa ning dakbayan sa Sugbo nga mao ang Bulacao River, Tagunol River, Kinalumsan River, Guadalupe River, Estero de Parian, Lahug River, Mahiga Creek, ug ang Butuanon River.

Atol sa gipahigayon nga miting niadtong miagi adlaw, ang opisyal sa CCENRO nga si Ligaya Britanya miingon nga ang mga river troopers maoy mogiya sa tanang mga volunteers ug mga kawani sa City Hall ngadto sa walo ka mga sapa nga angayan nga limpyohan.

Sa susama sab nga kalihokan sa silingang siyudad sa Dakbayan sa Talisay, gipanghipos sa Task Force Clearing Operations ang mga guba nga mga sakayan nga anha lang gipangbilin sa mga aseras ug daplin sa pangpublikong lugar sa Barangay Tanke niadtong miaging adlaw.

Ang mga nakabalda sa karsada gikarga ug gidala sa impounding area sa siyudad.

Si Edwin Nierves, pangu sa Anti-Vending Task Force nipasabot nga gipasidan-an na daan ang taga barangay aron mapahibawo ang mga hingtungdan sa paghipos sa ilang kagamitan.

Pero kadtong wala gyud nanghipos sila na ang nanghipos. Apan gipasabot ni Nierves nga ihatag rapud nila kini kung kuhaon kini sa mga nanag-iya. Matud pa niya nga gituman lang nila ang kamanduan sa ulohang buhatan sa Department of Interior Local Government (DILG) sa paghawan sa mga nakababag sa karsada.

Ang clearing operation task force daghan na nga nadawat nga mga reklamo kay nigamay na ang karsada tungod aning mga ilegal nga estraktura o mga gamit nga gibutang kilid sa mga gagmay ng daan nga mga karsada.

Sunod nga  rumbohon sa operasyon ang uban pa unya nga barangay sa Talisay. (BANAT NEWS)