Karsada sa Talisay gihingan sa kanhi mayor agig pasidungog

CEBU, Philippines — Gipasidunggan sa kagamhanan sa Dakbayan sa Talisay ang kanhi mayor ug nahimong judge pinaagi sa pagbutang sa pangalan niini sa karsada.

Karsada kini nga nagdugtong sa Barangay Cansojong, Tanke ug San Roque.

Si Talisay City mayor Gerald Anthony “Samsam” Gullas maoy nangulo sa pormal nga pag ila sa karsada nga Judge Leoncio Abarquez Street.

Sa wala pa mahimo nga huwes si Abarquez niserbisyo kini isip mayor sa Talisay sugod niadtong 1972 hangtud sa 1983.

Niundang siya isip mayor sa mosunod nga tuig human siya gitudlo isip huwes sa Regional Trial Court sa Tagbilaran.

Matud pa ni Gullas nga sa termino ni Judge Abarquez daghan siya og nahikap nga kasing-kasing ug kini iyang nadunggan sa mga tawo nga iyang nahinabi matag adlaw sa iyang opisina.

“You can live forever being remembered what you have done. Walay tambal ang doktor para mo live forever pero ang imong mga maayong gawi o legasiya maoy makapa live forever,” nagkanayon si Gullas.

Ang pamilya nga Abarquez wala mawala sa politika kay ang anak ni Judge Abarquez nga si Lani ang nahimong bise mayor sa Talisay.

Human ni Lani nisulod usab sa kalibutan sa politika ang bayaw niini nga si Atty. Romeo Villarante kinsa nahimo sab nga bise mayor.

Dako ang pasalamat sa pamilyang Abarquez ngadto ni Gullas ug mga kaubanan nga padayon nga niila sa mga buhat sa ilang padre de pamilya samtang nagserbisyo pa. (BANAT NEWS)