Manager sa CBRT miangkon nga dunay lapso sa pagbutang sa streetlights

CEBU, Philippines — Gipasalig ni Engr Norvie Imbong ang nagdumala sa Cebu Bus Rapid Transit nga iproseso ang mga gikinahanglan nga permit para sa link to Port nga bahin sa proyekto.

Kini atol sa meeting nga gipatawag ni konsehal Jerry Guardo ang overseer sa infrastructure sa siyudad sa Sugbo nga gitambongan usab sa LTFRB, CPO, CHAC, OBO ug ang kontraktor sa maong proyekto.

Ang maong tigum gipatawag sa konsehal human nahisgutan ang gipabarug nga mga streetlights nga nakaani og pagsaway sa may Osmeña Blvd tungod kay naa kini tunga sa usa ka lane sa karsada.

Nasayran ang maong proyekto kabahin kini sa pedestrianization sa CBRT gikan plaza Independecia ngadto sa may P. Del Rosario diin gipalapdan ang sidewalk.

Giangkon ni Imbong nga aduna silay lapso niini human pakyas sila pagkuha sa excavation ug working permit.

Niadtong Hunyo 20, 2024 si acting mayor Garcia nimando na sa pagtangtang sa maong mga streetlights tungod kay nakahatag kini og peligro sa mga commuters.

Hinuon nasabtan nga kining maong features nadugang ug kabahin sa Cebu Bus Rapid Transit (CBRT) system.

Aduna pa unyay mga tigum nga ipahigayon uban ni acting Mayor Raymond Alvin Garcia alang sa nagpadayon nga proyekto, sumala pa ni Konsehal Guardo.