Xmas wish ng 21 OFWs tinupad ni Villar

Binigyang-katuparan ni Nacionalista Party President Sen. Manny Villar ang inaasam ng may 21 overseas Filipino workers (OFWs) na maka­piling ang kanilang mga mahal sa buhay ngayong Kapas­kuhan.

Dahil sa tulong ni Se­nator Villar, nabigyan ng tiket sa barko at eroplano at maging ang kanilang pocket money ang 21 OFWs na nanunuluyan sa Overseas Workers Welfare Administration (OWWA) Center dormitory para ma­kauwi sila sa kani-kani­ yang probinsya. Dahil dito, wala na ngayong laman ang OFW dormitory.

Bukod sa pagpondo ng kanilang mga pamasa­he ay nakauwi rin ang mga manggagawa na masaya dahil sa ipinamudmod ni Villar  na regalo at pasalu­bong sa kanilang pamilya.

“Kami po ay napaka­suwerteng makasama at maasikaso ni Sen. Manny Villar ngayong nalalapit ang Pasko. Labis po ka­ming nagpapasalamat sa agarang pagtugon niya sa aming pangangaila­ngan,” pahayag ng isang OFW.

Nagsalu-salo ang mga OFW sa inihandang pag­kain at hinandugan ng mga ito si Villar ng isang birthday cake na may disen­ yong eroplano para ipaha­yag ang kanilang pasasa­lamat sa pagsusumikap nitong matulungan ang mga nagigipit na mga OFWs.

Ang mga OFW na tinu­­lungan ni Villar ay buhat sa United Arab Emirates, Syria, Saudi Arabia, Kuwait at Israel. Karamihan sa kanila ay uuwi sa Min­danao, kabilang ang isang OFW na nasiraan ng bait kaya aalalayan ng isang nurse patungo sa Zam­boa­nga at isang ina na uuwi ng Davao kasama ng kaniyang tatlong bu­wang sanggol na lalaki.

Kabilang din ang siyam na OFW na tumira sa ila­lim ng Candara Bridge sa Jeddah sa mga nabig­yan ng tiket at allowance.

Sila ay sina Bernardo Rodriguez, Pila, Laguna; Tori­bio Silva Bautista, San Pedro, Laguna; Emilio De­­mi­qo, Bambang, Laguna; Bernardo Rescar, Cebu City; Ali Macasalong, Da­vao Oriental; Roland Lacid, Davao del Sur; Fernando Moredo, General Santos City; Armando Villanueva, General Santos City at Yoland Jaya, Cebu City.

Ang pagtulong ng senador ay bahagi ng kaniyang programang “Sagip-OFW” at OFW Helpline 09174226800. (Ellen Fernando)