ASEAN Schedule tuloy kahit late dumating si Trump

MANILA, Philippines — Tuloy pa rin ang itinakdang schedule ng 49th ASEAN Summit and Related Summits sa kabila ng huling pagdating ni US President Donald Trump sa huling araw ng summit.

Ayon kay Department of Foreign Affairs (DFA) ASEAN spokesperson Dax Imperial, matutuloy pa rin ang closing ceremony sa Nobyembre 17 sa kabila ng nakatakdang ASEAN-US Special Summit sa huling bahagi ng araw na iyon.

“Nothing will be pushed back. We will proceed as planned with regard to the preparations, especially on the closing ceremony,” pahayag ni Imperial sa isang press briefing sa International Media Center sa Pasay City.

Samantala, kinumpirma rin ni Imperial na magkakaroon ng bilateral meeting sina Trump at ­Pangulong Ferdinand Marcos Jr. sa Nobyembre 18, sa sidelines ng summit.

Bukod dito, inaasahan ding magsasagawa si Marcos ng mga bilateral meeting kasama ang mga lider ng iba’t ibang bansa.

Inaasahang magsisimulang dumating sa Pilipinas ang mga lider at delegado mula sa iba’t ibang panig ng mundo sa Nobyembre 16 hanggang 18, habang nakatakda namang isagawa ang opening ceremony ng ASEAN Summit sa Nobyembre 15.

Sa Nobyembre 17, pangungunahan din ng Pangulo ang 29th ASEAN Plus Three Summit at 21st East Asia Summit, kung saan magkakaroon ng talakayan ang mga lider hinggil sa mga usaping estratehiko, pampulitika, at pang-ekonomiya na may magkakatulad na interes at alalahanin sa rehiyon.

Pangungunahan din ni Pangulong Marcos ang closing ceremony at ang seremonya ng paglilipat ng ASEAN Chairship sa Singapore. Susundan ito ng ASEAN-United States Special Summit na dadaluhan ni Trump.