Salamat sa pagduaw

Kun ikaw ang manggihunahunaon sa imong gigikanan sa wa lang damha madawat mo ang panalangin nga wa paabota. Sa tinud-anay lang gyud, nagkinahanglan ko og kwarta kay lagi ipanweldo sa mga panday nga sa ongoing construction kanako mibulig. Twelve thousand pesos ang gikinahanglan aron panweldo nila.

Wala na koy kwarta apan sa dihang niduaw ko kang Tatay Sin iya kong gihatagan og grasya ug kun pila man gani ako lang ang nasayud. Apan labaw sa materyal nga hinabang mao gyud ang mabulokon ug makahuloganong pagbinayloay sa mga hunahuna ug pamalandong.

Padayon gihapon siyang nahimong akong Tatay sa iyang mga mabulokon ug mga praktikal nga tambag ug pahimangno uban ni San Miguel diha sa botelya daghan ang among nahisgotan, pagpadagan sa parokya, pag-ugmad sa katawhang matuohon.

Ug sa akong pagpauli luwan sa Ceres Bus akong nakita ang pamaagi sa Dios kun nganong nisantop sa akong hunahuna ang paghapit gud sa iyang yano apan hamugaway nga pinuy-anan aron itagik kining pamalandong uban ang dakong pagpasalamat sa mga grasyang nadawat. Lingi kun diin ka gikan ug maabot mo ang imong padulngan.