CTO mosugod na pag-record sa gihatagan og tax exemptions

CEBU, Philippines — Sugdan na karon sa City Treasurer's Office (CTO) ang pag record sa mga gihatagan og tax exemptions nunot sa mga hangyo sa Cebu City Council diin dugay na nga walay record.

Kagahapon (Miyerkules), Abril 24, 2024, nagpahigayon og executive session nga gipasiugdahan sa Minority Floor Leader sa Cebu City Council nunot sa "pipila" ka mga tax exemption requests nga gihatag sa konseho sa dakbayan.

Matud ni Nestor Archival, niadtong Enero 24, 2024, naalarma sila human ang CTO niingon nga sa pag isyu og resolution sa konseho sa paghatag og tax exemption, mu isyu sab dayon sila og certification ug mupatuman og tax exemption diin walay natala nga mga records.

Dugang pa niya nga importante ang pagpatuman sa protocol sa gobyerno nga adunay data of record.

"Na alarm ta kay niingon man ang CTO nga di sila mu keep og record. Pagpangutana nato, di sila kabalo so ako lang ni i clarify kung mao ba jud ni atong process," matud ni Archival.

Atol sa sesyon, giimbitar si Julieta Marquita, ang RPT division chief ubos sa CTO kinsa niingon nga ang ilang gitipigan lang nga mga rekord mao ang mga nalambigit sa aktuwal nga koleksyon.

Kadtong gihatagan og tax exemption gikinahanglan nga mosumiter sa dokumento sa bisan unsang deed of conveyance, sale donation exchange extra judicial o partition, Certificate Authorizing Registration (CAR), pinakaulahing tax declaration ug uban pa.

Kadtong mga taxable o dili exempted gikinahanglan nga moagi sa proseso sa pag-compute sa transfer tax nga isumiter ngadto sa CTO ug sa City Assessors.

Samtang kadtong exempted gitambagan nga mokuha sa kopya sa resolusyon sa konseho. Kadtong gihatagan og exemptions ubos sa Urban Development Housing Act (UDHA) ug ubos niini kasagaran mao ang Urban Poor groups.

Gawas niini, si Marquita niingon nga giduol na sila sa National Housing Authority (NHA) legal og nag kwestyon sa indibidwal nga paghangyo sa resolusyon sa wala pa ang grouping system.  Bahin sa mga record, giangkon ni Marquita nga ila lang file ang record sa mga exempted subay sa resolusyon ni Archival.

Gitataw ni Archival nga bisan sa mga tax exemptions, importante nga marecord kung pila ang kantidad nga gi-waive. (BANAT NEWS)