Malasakit Desk nakatabang na og kapin 10 mil ka tawo
![Malasakit Desk nakatabang na og kapin 10 mil ka tawo](https://media.philstar.com/images/articles/malasakit_2018-05-01_22-08-58.jpg)
CEBU, Philippines – Gitunol na ni Special Assistant to the President Christopher “Bong” Go ang tseke nga P50 milyones ngadto kang Vicente Sotto Memorial Medical Center (VSMMC) direktor Gerardo Aquino ug regional director sa Department of Health (DOH-7) Jaime Bernadas kagahapon.
Ang maong pundo gisaad ni Pangulong Rodrigo Duterte sa iyang pagbisita sa Sugbo niadtong Pebrero 12 ning tuiga paglusad sa ‘Malasakit Center’ diha sa VSMMC. Ang Malasakit Desk sumala pa ni Presidential Assistant for the Visayas Michael Lloyd Dino, usa ka one-stop shop diin anha iproseso ang mga kinahanglanon sa mga kabus nga pasyente aron malibre sa tambalanan.
Adunay mga representante sa PhilHealth, DSWD, PCSO ug uban pa sa Malasakit Desk aron di na kinahanglang tagsa-tagsaon og adto ang maong mga ahensya.
Matud ni Dino ang Malasakit Desk namugna tungod ni Go human nga nasayran nga adunay kwarta ang gobiyerno nga mahimong magamit aron pagtabang sa mga kabus nga mga pasyente.
Sukad nga gibuksan ang Malasakit Desk, miabot na og 10, 944 ang nakabenepisyo niini. Matud ni Go nga kon magmalampuson kini dinhi palapdan sa tibuok Visayas.
Gibutyag ni Go nga ang maong pundo alang unta sa Davao diin aduna usab susamang programa nga gitawag og ‘Linga para sa Mahirap’ nga gisugdan ni Duterte sa dihang usa pa kini ka kongresista hangtud nahimo kining mayor sa Davao. Apan tungod kay daghan man gyung mga taga laing probinsya nga motuyo og adto sa Davao aron makabenepisyo niini, nadesisyonan nga maghimo usab niining programaha sa ubang mga lalawigan. (CNU Intern/IBM)(BANAT NEWS)
- Latest