Rama miawhag sa DENR nga ipatangtang na ang mga kahoy

CEBU, Philippines – Giawhag ni Mayor Michael Rama ang Department of Public Works and Highways ug Department of Environment and National Resources sa pagtrabaho sa nasabotan kaniadto nga ipa-earth ball ang mga punoan sa kahoy sa center island diha sa Pope John Paul II Avenue.

Matud pa ni Rama wala nay laing rason nga dili sugdan ang pagbalhin sa maong mga punoan tungod kay nakompleto na sa siyudad ang mga rekisitos nga gipangayo.

Mokabat onse ka punoan sa mga kahoy ang buot nga ipabalhin sa siyudad tungod sa himuong pagpalapad sa karsada sa maong dapit.

Apan si Eddie Llamedo, tigpamaba sa DENR nga gitawagan sa Banat News nagkanayon nga wa pa silay nadawat nga rekisitos gikan sa City Parks and Playgrounds sa siyudad sa Sugbo.

Ang mga rekisitos naglakip sa Barangay Certification of no objection, certification of endorsement gikan sa DPWH ug kinahanglanon nga magpahigayon og public hearing uban ang environmental groups ug NGOs, private sectors kalabot sa maong plano.

Dugang pa ni Llamedo nga kaniadtong Agosto 21,2015 pa nagpadala og suwat ang DENR ngadto sa siyudad apan hangtud karon wala gihapon kini ma comply. Gipasabot ni Rama nga ang maong proyekto dili lang alang sa nagsingabot nga International Eucharistic Congress (IEC) kun di apil na usab kini sa umaabot nga dagko pang kalihokan sa dakbayan sama sa Sinulog ug uban pa. Samtang nagmalampuson ang Cebu City Transportation Office (CCTO) sa pagpahigayon og dry run gikan sa dan Pope John Paul II paingon sa eskina Cardinal Rosales nga diin gidid-an pagpasud ang mga pribadong sakyanan sa maong dalan. – /EIM) (BANAT NEWS)