PCG nanawat na og mosalmot sa fluvial parade
CEBU, Philippines - Ang Philippine Coast Guard-Cebu miawhag sa tanan nga gustong mosalmot sa fluvial procession sa pagpakig-alayon sa ilang buhatan alang sa hapsay ug luwas nga kalihukan.
Si PCG Commander, Commodore William Melad mibutyag nga napulo pa lang ka mga partisipante ang nagpatala sa ilang listahan apan dili sila makapugong adtong buot mosalmot sa nahisgutang adlaw na gyud.
Ang PCG ug ang Naval Forces Central maoy gitahasan nga sigurohong luwas ang dagan sa fluvial procession karong umaabot Sabado.
"We are coordinating with the Navforcen and sa ngayon the planning committee ng PCG is meeting for this," matud ni Melad.
Siya midugang nga mas maayo og mahibaw-an nila kung pila gyud ka buok ang partisipante aron ilaha kining mapahimutang aron sa paglikay sa mga kakulian nga motumaw.
"Kung gusto natin nang safe and orderly event mas mabuti kung alam natin saan sila nakaparada para hindi nakaharang sa procession," matud niya.
Ang PCG mo-deploy og upat ka barko ug duha ka mga rubber boats sa maong adlaw isip mga marshalls.
Si Melad mibutyag nga ang ilahang konsepto mao ra sa konsepto ni kanhi PCG Commander Rolando Punzalan sa miaging tuig apan dunay gamay nga kausaban niini. "Yung route depende kasi sa organizers," matud niya.
Sa nangaging tulo ka mga fluvial processions, gidili ang pagdala og mga bata sa mga sakyanan sa dagat, gidili ang pagdala og ilimnong makahubog ug gidili sab ang pagdala og pabuto aron malikay sa mga aksidente.(/EIM)(BANAT NEWS)
- Latest
