DSWD7 nagpaabot og donasyon sa breast milk

CEBU, Philippines -  Ang   mga  inahan  nga modonar    sa ilang gatas o  breast milk   ngadto  sa  Reception and Study Center for Children (RSCC), nga   gidumala  sa  Department of Social Welfare and Development (DSWD-7)   maoy  gipaabot  sa tagdumala  niining maong  ahensya.

Ang  RSCC mao  kini  buhatan  nga  moalagad  sulod  sa 24  oras  sa  mga  batang masuso  nga  mag-edad  og 0 hangtod 2 ka tuig  sukad  pa niadtong 1983.

Sumala pa ni Jaybee Binghay, tigpamaba sa DSWD-7 nga kadaghanan sa mga bata nga  giatiman niining  maong  buhatan  mao kadtong  mga  giabandona, napasagdan, giabuso, gisurender o boluntaryong gisalig na lamang  sa  mga  kawani  niini  sa pamilyang  nakabsan  na  og  rekurso  nga  ikapakaon  sa ilang  anak.

Si Carla Crecus  usa  sa  mga  inahan  nga  midonar  sa iyang  gatas  nga bali  og 30 ounces  didto  sa RSCC  nagkanayon  nga  bisan  siyam  na  ang  iyang anak  apan  wala  siya  magpanuko sa paghatag  sa iyang   gatas  ngadto   sa maong  sentro  tungod  ug alang  sa  gagmay’ng  mga bata  nga  giatiman  niini.

Matud pa ni Crecus nga nadasig gayud siya sa pagdonar sa iyang kaugalingong gatas tungod kay daghan pa man siya og subrang gatas para sa iyang anak unya gusto niya nga makatabang sa ubang mga masusong bata nga walay inahan nga maka- patotoy.

Ang  breast milk   maoy giila   nga labing  kompleto nga pagkaon  sa batang  masuso  tungod  sa   ka puno  niini  sa sustansiya   nga labing makapahimsog sa bata  ug  makapalig-on  sa ilang lawas  batok  sa  mga  hulga  sa mga balatian.

Si DSWD-7 Nutritionist Dietician, Melinda Canares miawhag  usab  sa publiko   nga kun  modonar  sila  og  gatas  sa inahan  moderetso  lang  sila  ngadto  sa buhatan  sa RSCC  nga  nahimutang  ra usab  sa buhatan  sa DSWD 7.

Dugang pa ni Canares nga ang  pagdonar  og  gatas    makatabang usab sa  kahimsog  nga gikinahanglan  sa  lawas  sa mga inahan, makapaminus sa risgo sa kanser  sa totoy, ovarian ug cervical cancers, makapaminus sa anemia ug makasanta  sa pag-us-os sa timbang.

Matud  pa  niya  nga  ang  idonar  nga  gatas  sa inahan  ila  kining  ipundo  sa usa  ka  special freezer bags nga gidisenyo alang sa fresh milk ug  mao  usab  kini  ang  ilang  ipabuhat  ngadto  sa  mga  inahan  nga  modonar  niini  aron  nga lab-as lang  gihapon  ang  maong  gatas  nga  moabot  sa ilang  buhatan  pinaagi  sa  pagsulod  niini bisan unsang limpyo, sterilized, gahi nga plastik o glass container. (WC)(BANAT NEWS)