4-anyos nalatayan sa SUV

CEBU, Philippines — Patay ang usa ka 4-anyos nga batang babaye human kini naligsan og SUV diha sa Salvador Extension eskina Camanchile Drive, Sitio Camanchili, Barangay Labangon, siyudad sa Sugbo niadtong Sabado sa gabii, Abril 12, 2025.

Ang biktima mao si alyas Naizah, 4 anyos, nagpuyo sa Sitio Andang, Barangay Labangon ning siyudad.

Samtang ang driver sa SUV mao si alyas Nacario, 70 anyos, usa ka retiradong police ug residente sa Camanchile drive, Salvador Extension, Barangay Labangon ning siyudad.

Sa imbestigasyon sa Traffic Enforcement Unit Cebu City Police Office ang SUV nagdagan sa may Salvador Street ug ni-maneuver kini pa left-turn sa Camanchile drive.

Pag-abot sa naasoy nga lugar giingong naigo sa luyo nga ligi sa wala sa maong SUV ang ulo sa biktima.  Sigon pa sa inahan sa bata nananghid nga mangihi samtang siya naninda sa karenderya.

Nakit-an matud pa sa inahan ang SUV nga niagi apan paglabay sa pila ka gutlo giingnan nalang siya sa mga tambay nga iyahang anak naligsan niini ug giingong wala nihunong.

Nibalik matud pa ang driver sa SUV sa dapit asa nahitabo ang insidente nga dili ra layo sa gipuy-an niini aron tabangan ang biktima dihang gipahibawo siya sa iyahang ig-agaw nga nakaligis kini og pedestrian.

Gideklarar ang biktima nga walay pulso ug wala na nagginhawa sa mga niresponding medical personnel samtang ang driver sa SUV gidala sa buhatan sa TEU. — /IBM (BANAT NEWS)