CHR mopahigayon og trainings sa pagsaulog sa human rights week

CEBU, Philippines — Sa pagsugod sa National Human Rights Consciousness Week kagahapon ang Commission on Human Rights- 7 nagtinguha sa paghatag og gahum sa tanang sektor sa komunidad pinaagi sa mga kalihokan isip kabahin sa padayong pagpasiugda sa tawhanong katungod.

Si Atty. Arvin Odron, direktor sa CHR-7 nagkanayon nga ang mga kalihokan mao ang ilang pamaagi sa paghatag og gahum sa komunidad ug pagpakita sa ilang katungdanan sa pagpasiugda sa tawhanong katungod aron walay bisan kinsa nga mabiyaan.

Ang National Human Rights Consciousness Week gi-obserba matag Disyembre 4 ngadto sa 10 kada tuig subay sa Akta Republika 1901 kun “An Act to Amend Commonwealth Act Numbered Six Hundred and Thirteen, Otherwise Known as the Philippine Immigration Act of Nineteen Hundred and Forty, as amended”  ug ang tema karong tuiga moa ang "Empowering Humanity: Upholding Dignity, Protecting Rights, and Promoting Peace" nagsilbing panawagan sa pagpasiugda sa importansiya sa tawhanong katungod sa pagtukod sa usa ka makiangayon, malinawon, ug tawhanon nga katilingban.

Matud ni Odron nga usa sa mga kalihokan nga ilang himuon sulod sa usa ka semana mao ang pagbisita sa usa ka orphanage sa Barangay Talamban, Dakbayan sa Sugbo human sa kick off ceremony aron tan-awon ang sitwasyon sa mga bata nga biktima sa human rights violence ug abuse.

 Sa Disyembre 5, 2024, ang Promotion and Advocacy Division sa ahensiya mopahigayon og paralegal training alang sa mga estudyante sa Political Science sa University of the Philippines Cebu (UP), University of Cebu (UC), University of Visayas (UV), University of San Jose-Recoletos (USJR), ug University of San Carlos (USC).

Samtang sa Disyembre 6 ngadto sa 7, 2024 adunay duha ka adlaw nga seminar training alang sa mga media practitioners nga nag-ulohan og "Media, Human Rights, and Vulnerable Sectors: A Seminar-Training for the Members of the Cebu Media in Reporting News Involving Violence and Vulnerable Sectors."

Sa Disyembre 7, 2024 usab ang USC sa pakigtambayayong sa CHR-7 mopahigayon og forum kabahin sa voters' rights kini isip pagpangandam sa national ug local elections sunod tuig.