Babaye natagakan og bato patay

CEBU, Philippines — Patay ang usa ka 37-anyos nga babaye human kini natagakan og bato samtang nanguha og anapog duol sa balay niini sa Sitio Buyongan, Barangay Valencia, Lungsod sa Alegria niadtong Martes sa hapon.

Ang biktima mao si Geralyn Letigio Geolin, upat kabuok anak, nagpuyo, residente sa nahisgutang lugar.

Gikataho nga ang biktima nanguha og anapog aron makahimo og hollow blocks nga gamiton sa pag-renovate sa ilang balay apan aksidenteng natagak ang anapong kuyog ang bato ug yuta ug nitabon kini ngadto sa biktima.

Giingong nabali ang spine ug tiil sa biktima ug ang ulo niini naigo sa bato nga hinungdan sa iyang kamatayon.

Si Barangay Konsehal Miguel Indino nibutyag nga niabot sa 500 ka kilo ang gibug-aton sa anapog ang nitabon ngadto sa lawas sa biktima.

Ang inahan sa biktima nga si Sulpicia Letigio nagkanayon nga gibadlong na niya iyahang anak sa padayon nga pagkuha og anapong sa dapit apan ang biktima igo ra moingon nga stable ang anapog.

Apan adunay tipaka sa anapog nga natagak ug naigo ang biktima. (BANAT NEWS)