P25B budget sa Probinsiya sa Sugbo alang sa 2025 aprobado na

CEBU, Philippines — Hingpit na nga giaprobahan sa hunta probinsiyal ang giduso nga P25 bilyones nga budget sa Probinsiya sa Sugbo alang sa tuig 2025.

Atol sa regular session sa provincial board kagahapon, Disyembre 2, ang appropriation ordinance alang sa proposed budget sunod tuig nga gipangamahan ni Bokal Glenn Anthony Soco giaprobahan sa third ug final reading ug gikatakda nga isumiter ngadto kang Gobernador Gwendolyn Garcia aron mapirmahan kini.

Ang pundo sa sunod tuig mas taas kini og 8.69 porsyento itandi karong tuiga.

Dako nga gahin sa maong giduso nga pundo ang Annual Investment Plan (AIP) nga nikabat ngadto sa P14 bilyones aron mapundohan ang nagkadaiyang programa ug proyekto nga buot ipatuman sa probinsiya sa sunod tuig gikan sa mga imprastraktura ngadto sa operasyon sa mga tambalanan nga gidumala sa Kapitolyo, water system, pagpreserba sa mga cultural ug heritage nga istraktura, countryside development programs ug uban pa.

Ug kon basehan ang “summay appropriation” sa matag departamento sa Kapitolyo, ang buhatan sa gobernador maoy niduso og pinakadako nga pundo alang sa sunod tuig nga nikabat ngadto sa P19.1 bilyones diin mas dako kini itandi sa P17 bilyones nga budget karong tuiga.

Ang buhatan sa bise gobernador nangayo usab og dako-dako nga pundo sa tuig 2025 nga nikabat ngadto sa P107 milyones.

Si Soco, sa iyang budget message kagahapon atol sa regular session nagkanayon nga ang giduso nga pundo sa sunod tuig nakapasar sa mga rekisitos, rules ug regulasyon nga gilatid sa Department of Budget and Management ug sa Local Government Code.

“The Php 25 Billion budget for Budget Year 2025, carefully crafted and uniquely suited for the demands of the year to come is a testament of this administration’s commitment in making Cebu adoptive and responsive to its ever-changing needs without losing sight of its long-term goals and objectives”, matud ni Soco.

Dugang ni Soco nga ang giduso nga pundo gihimo aron mapalambo pa ang paghataga og serbisyo sa mga konstituwente, pagpalambo sa ekonomiya sa probinsiya ug pagimplementar sa mga programa ug poryekto nga maoy motubag sa gikinahanglan sa nagkadaiyang sektor sa lalawigan. (BANAT NEWS)