CCCSP modawat og aplikante karong Enero

CEBU, Philippines — Ang Dakbayan sa Sugbo modawat na og mga aplikante alang sa Cebu City College Scholarship Program (CCCSP) sugod karong Enero 5 hangtod Marso 31 sunod tuig.

Si Judy Yap kinsa mao ang CCCSP executive director nakighinabi sa Sugbuanon Channel ug miingon nga nagpahigayon na ang iyang buhatan og orientations sa tanang tinun-an sa senior high school sa mga pampubliko nga tunghaan sa siyudad niadtong miaging buwan.

Karong buwana mopahigayon sab og orientation ang CCCSP sa mga pribadong tunghaan alang sa maong programa.

Ang mga gikinahanglan aron makapahimulos sa scholarship program mao kining mosunod, kinahanglan gradwado kini sa tunghaan sa Dakbayan sa Sugbo.

Aduna kini origihinal nga kopya sa Cebu City COMELEC Voter’s Certification sa mga ginikanan og kung nagpangidaron na kini ngadto sa 25 pataas, kinahanglan nga nakabotar kini sa miaging duha ka lokal nga piniliay.

Kinahanglan nga adunay orihinal nga kopya sa Barangay certification.

Kinahanglan sab ang orihinal nga kopya sa hiniusang Annual Income Tax Return (ITR) sa duha ka ginikanan o tinuig nga ITR sa single parent nga dili molapas sa P400,000 matag tuig.

Aron nga mapamatud-an nga residente sa syudad, kinahanglan adunay kopya sa bill sama sa MCWD, VECO o PLDT.

Kopya sa PSA Birth Certificate, kopya sa Elementary Diploma gikan sa Public Elementary School sa Cebu City, kopya sa Junior High School Diploma gikan sa Public JHS sa Cebu City, ug kopya sa Senior High School Diploma gikan sa Public SHS sa Cebu City o Alternative Learning System (ALS) diploma o graduation certificate.

Matod ni Yap nga ang mga gradwado sa pribadong tunghaan mahimong makapahimulos sa CCCSP basta naka- gradwar sila sa public junior high school o naka-avail sa Education Voucher System, Education Service Contracting, ug School Certification on Academic/ Varsity Scholarship sa Department of Education.

Sa higayon nga makasumiter na sila sa mga gikinahanglan, ang mga prospective scholars kinahanglang mopaubos sa qualifying examination sa dili pa ang CCCSP sa Abril sunod tuig. (BANAT NEWS)