Pagpahigayon sa Pasko sa Carbon gibuksan na

CEBU, Philippines — Opisyal nga giablihan sa publiko ang ika-19 nga tuig sa “Carbon Pasko Na” kagahapon (Miyerkules) aron ma-accommodate ang debosyon sa mga vendors ug mapausbaw usab ang market tourism sa dakbayan sa Sugbo.

Ang Carbon Interim Market nipahibawo niini pinaagi sa press conference diin ila usab nga gi-unveil ang tema nga “Malipayong Kasing-kasing, Madasigong Pagsaulog sa Pasko.”

Si Maria Pino, pangulo sa Cebu City United Vendors Association (CCUVA), nipasabot nga ang Pasko sa Carbon gimugna aron ma-accommodate ang mga vendors nga kasagarang way panahon sa pagtambong sa mga Novena masses.

Matud niya, 19 na ka tuig nga nagsugod sila sa pagsaulog niini nga kalihokan sa Carbon Market tungod sagad sa mga vendors dili makatambong sa physical masses.

Ang tumong mao nga ang mga vendors dungan nga nakaginansya gihapon ug makatambong sa Misa de Gallo, nga magsugod sa Disyembre 16, 2024, ug molungtad hangtod sa ika-24.

Ang opening ceremony naglakip sa parada sa mga vendors, stakeholders, ug ambulant vendors.

Alang sa seguridad, si Police Major Abrasado, Hepe sa Carbon Police Station, niingon nga nakadawat sila og dugang personnel gikan sa Cebu City Mobile Force (CCMF) aron paghatag og dugang seguridad sa tibuok selebrasyon.

Si Raquel Arce, pangulo sa Cebu City Transportation Office (CCTO), niingon nga nag-abli sila og bakanteng luna atubangan sa Carbon Police Station, nga maoy magsilbing designated parking space.

Hinuon, giawhag niya ang adunay mga sakyanan nga magbinantayon sa "no stopping" ug "no parking" signs aron malikayan nga makabalda sa dagan sa trapiko. Gitataw ni Arce nga wala silay gilibkas nga traffic regulations alang sa selebrasyon.

Usa sa mga highlight sa Carbon Pasko Na mao ang pagsaulog sa Fruit Festival, usa ka prelude sa pagsaulog sa Bag-ong Tuig. Kini nga kalihokan magsugod sa Disyembre 26 hangtod Disyembre 31, 2024.

Si Barangay Kapitan Mark Miral namahayag usab nga gikinahanglan ang pagpahigayon sa Pasko sa Carbon aron makadani og daghang turista. (BANAT NEWS)