Kwarta nga gikawat giduwa og scatter

CEBU, Philippines — Natingkagol sa detention cell sa Mabolo Police Station sa Cebu City Police Office ang usa ka 21-anyos nga lalaki human nasakpan nga nangawat og kwarta diha sa box sa pisonet computer machine sa Sitio NGA, Barangay Lahug, Siyudad sa Sugbo niadtong  Martes sa hapon.

Ang suspetsado mao si alyas “Gab”, walay trabaho samtang ang reklamante usa ka 63-anyos nga babaye nga silingan sa suspetsado.

Ang suspetsado giingong niangkon sa nahisgutang krimen.

Nasayran nga nikabat ngadto sa P10,000 ang kwarta nga nakuha sa suspetsado kinsa nadakpan dayon sa gihimong  follow up operation sa kapolisan apan wala na nabawi ang kwarta.

Nailhan ang suspetsado pinaagi sa footage sa closed circuit television diha sa lugar ug nakita usab ang pagkuha niini sa kwarta.

Ang suspetsado nibutyag sa kapolisan nga ang kwarta nga iyang gikawat iyahang gipalit og pagkaon ug giduwa og online sugal nga scatter.

Giangkon usab sa suspetsado nga dugay na siya’ng nagduwa og scatter ug wala siya'y laing kwarta magamit aron iduwa tungod kay wala siya sweldohe sa iyang pagka- construction worker sulod sa duha ka adlaw.

Nangayo og pasaylo ang suspetsado sa iyang nabuhat ngadto sa biktima apan pasakaan gihapon kini og kasong robbery.

Nasayran nadakpan na kaniadto ang suspetsado gumikan gihapon sa susamang kaso.

Sa laing bahin, kapolisan sa Dakbayan sa Talisay nipahugot sa ilang police visibility aron mapugngan ang krimen.

Kini ang gibutyag ni Police Lieutenant Colonel Epraem Paguyod, hepe sa Talisay City Police Office.

Matud ni Paguyod ngadto sa mga Talisaynon nga dili mabalaka kong makakita og mga sakop sa Special Weapon and Tactics (SWAT) personnel diha sa mga dapit nga hugpaanan sa mga tawo sama sa supermarket ug uban pa tungod kay kabahin kini sila sa pagpahugot sa police visibility.

Samtang ang Police Regional Office-7 nakatala og og 40 porsyento nga pagkunhod sa index crime karong tuiga itandi sa nilabay’ng tuig.

Si Police Brigadier General Roy Parena, officer-in-charge sa PRO-7 nipahibawo nga ang index crime cases nikunhod gikan sa 85 sa Nobiyembre 24 hangtud sa 30, 2023 ngadto sa 51 ka kaso sa samang mga semana sa tuig 2024.

Gihatagan og pagtagad ni Parena ang pagkunhod sa focus crimes apil ang homicide, physical injury, rape ug theft.

Ang kaso sa robbery nikunahod kini ngadto sa 78.57 porsyento gikan sa 14 ka kaso naa nalang kini sa tulo ka kaso.

U gang maong kalamboan gumikan kini sa coordinated efforts sa nagkalain-laing law enforcement agencies. (BANAT NEWS)