Pagpalit og dugang pump girekomendar aron masulbad ang baha

CEBU, Philippines — Dugang mga pump ang girekomendar sa kagamhanan sa dakbayan sa Talisay nga paliton aron magamit alang sa dinalian nga pagpahubas sa tubig baha diha sa kabarangayan sa siyudad.

Sa nasayran niadtong Domingo, atol sa pagbunok sa kusog nga ulan, usa ang dalan sa Barangay Bulacao ang nakasinati sa pagbaha hinoon dakung tabang matud pa ang kanunay nga paglimpyo sa kanal human nilanat lang og dul-an sa usa ka oras ang nasinating pagbaha.

Samtang dili mominos sa lima ka sitio sa Barangay San Roque sa Dakbayan sa Talisay ang nakasinati usab og lapas sa tuhod nga pagbaha niadtong Domingo sa gabii hangtud na sa adlaw nga Martes.

Suma pa ni Gary Togonon ang pangulo sa Aksyon Agad Team nga moabot sa 60 ka panimalay sa lima ka sitio apektado sa baha.

Nagkanayon si Togonon nga lupa kun naubos ang maong dapit hinungdan nga nilanat hangtud sa adlaw nga Martes ang pagpasuyop sa tubig baha nga gihimo sa mga kawani sa aksyon agad team.

Ang maong barangay gihatagan sa Talisay City Government og pito ka pump alang sa daling pagpasuyop kon ugaling adunay pagbaha.

Gitug-an ni Togonon dili mominos sa upat ka mga barangay ang ilang gikonsiderar nga flood prone barangay ug kini mao ang Barangay San Roque Cansojong, Biasong ug Pooc. (BANAT NEWS)